„Мојот пристап е дека која и да е демократска влада подготвена да работи со нас, ние работиме заедно“, рече Фон дер Лајен на прашањето дали има загриженост за изборите во Италија. „Ако работите тргнат во тешка насока… Зборував за Унгарија и Полска, ги имаме алатките“, додаде таа
Матео Салвини, шеф на десничарската партија Лига, која е дел од коалицијата предводена од Џорџа Мелони, ги осуди коментарите на Фон дер Лајен и ги нарече „срамна ароганција“
Претседателката на Европската комисија, Урсула фон дер Лајен, ја предупреди Италија за последиците доколку отстапи од демократските принципи, упатувајќи индиректна закана пред денешните изборите на кои се очекува да победи екстремно десничарскиот блок предводен од Џорџа Мелони.
Коментарите укажуваат на загриженост во некои европски метрополи од исходот на изборите и сугерираат дека односите меѓу Брисел и Рим би можеле да станат турбулентни доколку се потврдат прогнозите за победа на Мелони и нејзините партнери.
„Мојот пристап е дека која и да е демократска влада подготвена да работи со нас, ние работиме заедно“, рече Фон дер Лајен на прашањето дали има загриженост за изборите во Италија. „Ако работите тргнат во тешка насока… Зборував за Унгарија и Полска, ги имаме алатките“, додаде таа.
Матео Салвини, шеф на десничарската партија Лига, која е дел од коалицијата предводена од Џорџа Мелони, ги осуди коментарите на Фон дер Лајен и ги нарече „срамна ароганција“.
„Што е ова, закана?“, напиша тој на Твитер. „Почитувајте го слободниот, демократски и суверен глас на италијанскиот народ“, додаде тој.
Фон дер Лајен очигледно алудираше на препораката на Европската комисија од минатата недела да се спречи Унгарија да користи околу 7,5 милијарди европски фондови поради корупција, што е прв таков случај во рамките на механизмот за заштита на владеењето на правото.
Ерик Мамер, портпарол на Европската комисија, им рече на новинарите во Брисел дека Фон дер Лајен не сака да се меша во италијанската политика.
„Таа ја истакна улогата на Комисијата како чувар на (европските) договори во однос на владеењето на правото“, рече тој.
Парламентарните избори што денеска се одржуваат во Италија се очекува да донесат големо свртување во земјата кон десно. Анкетите пред изборите му даваат убедлива предност на обединетиот десен блок пред поделената левица, а италијанската влада, за прв пат во историјата, би можела да биде предводена од жена, Џорџа Мелони. Резултатите од изборите во Италија би можеле значително да се одразат на односите внатре во Европската Унија, но и кон Русија поради блиските врски на лидерите на партиите од десничарскиот блок со Владимир Путин.