Претседателката на Инспекцискиот совет, Магдалена Филиповска Грашковска, вели дека според годишните планови за 2021 година се предвидени вработувања на 104 инспектори во повеќе инспекторати, а од нив 15 се предвидени за во Државниот пазарен инспекторат (ДПИ).
Таа вели дека овие вработувања се одобрени на владина седница уште пред два месеца и додава дека немаат поврзаност со распределбата на административните службеници, постапка што деновиве е и причина за преписката меѓу директорот на Државниот пазарен инспекторат, Стојко Пауновски и најавата од премиерот Зоран Заев дека тој ќе биде разрешен.
Филиповска Грашковска во интервју за МИА, вели дека на почетокот на февруари на барање на Инспекцискиот совет, а во координација со вицепремиерот Љупчо Николовски, Владата ги задолжила Министерството за финансии, Министерството за информатичко општество и администрација и Министерството за политички систем и односи со заедниците со највисок приоритет да ги разгледаат и одобрат Годишните планови за вработување на инспекциските служби за 2021 година на сите инспекциски служби.
Според неа, во овие планови, како приоритетни се вработувањата во Државниот пазарен инспекторат, Државниот инспекторат за труд, Инспекторатот за животна средина, Државниот инспекторат за транспорт и Државниот комунален инспекторат.
„Според овие Планови, на седница на Влада помина одлука за одобрување на 104 нови вработувања во сите инспекциски служби во 2021 година, од кои 15 нови вработувања се предвидени за ДПИ. Министерството за финансии и останатите надлежни министерства постапуваат тековно за секој поединечен годишен план за вработување на сите инспекторати“,
вели таа.
На прашањето дали распоредувањата на рамковните административни службеници ќе влијае врз овие годишни планови на инспекторатите, таа вели дека нема да влијаат.
„Распоредувањата на административните службеници кои се распоредуваат според усвоениот План за распределба на административните службеници преку Програмата К-5, нема апсолутно никаква поврзаност со годишните планови за вработувања на инспекторатите. Станува збор за две различни работи, кои се спроведуваат и преку различни процедури. Овие вработувања преку Програмата К-5, нема да направат никаква промена во барањата што ги имаат доставено инспекциските служби согласно нивните годишни планови, ниту во ефикасноста на работењето на инспекторатите. Потребата од зајакнување на кадровската екипираност на инспекторатите е повеќе од неопходна, особено на Државниот пазарен инспекторат, кој има капацитет и потреба да ги ангажира новите вработувања според годишните планови и оние што се планирани според Програмата К-5 за правична застапеност, со оглед на неговата интензивност во работата. Така што, секој дополнителен човечки ангажман е добредојден за сите инспекциски служби“,
вели Филиповска-Грашковска.