На Инфективната клиника во Скопје во моментов има 59 пациенти, од кои 12 се во потешка состојба, од нив петмина се на механичка вентилација
Две жени од Струшко се двата нови смртни случаи во изминатите 24 часа како последица од компликации од коронавирусот.
Министерот за здравство Венко Филипче на прес-конференцијата денеска информира дека синоќа на Клиниката за инфективни болести и фебрилни состојби во Скопје починала 65-годипна жена од Лабуништа, која една недела се наоѓала на клиниката и имала претходни хронични болести: хронично опструктивна белодробна болест, дијабетес, срцева слабост и зголемена телесна тежина. И пациентката која во неделата наутро почина во болница во Струга, а на која посмртно ѝ беше земен брис, е позитивна на ковид-19.
Се чекаат резултатите од тестирањето на починатото лице од Битола, кое беше во самоизолација.
Во изминатите 24 часа регистрирани се 25 нови заразени и тоа во Скопје- 7, Куманово-7, Прилеп-2, Тетово-5, Струга-2, Гевгелија и Кочани по 1.
Со ова вкупно во земјава има 354 заболени од ковид-19, од кои најмногу во Скопје – 183, Куманово – 54, Дебар – 47,Штип – 15,Прилеп – 12,Тетово -13, Струга – 9, Велес – 6, Битола – 4, Охрид – 3, Кавадарци и Гевгелија по 2 и по еден во Гостивар, Струмица, Крива Паланка и Кочани.
На Инфективната клиника во Скопје во моментов има 59 пациенти, од кои 12 се во потешка состојба, од нив петмина се на механичка вентилација.
Петмина се испуштени на домашно лекување откако контролните тестирања покажале негативни резултати.
Резултатите од контролните тестирања се очекуваат и од 11 од вкупно 28 пациенти кои се во Дебар, за што Филипче рече дека се во добра здравствена состојба и дека се поминати доволен број денови за да бидат негативни.
Досега во земјава се направени вкупно 3 775 тестирања за ковид-19.