Министерот за здравство Венко Филипче утре ќе одржи средба со претставници на здруженијата на пациенти кои денеска излегоа со свои барања во однос на препораката на здравствените власти за враќање на работа на дел од хронично болните.
Најавата за средбата ја испратија од Министерството за здравство само неколку часа откако здруженијата јавно излегоа со барањата. Во пресрет на утрешната средба, од Министерството потсетуваат дека Филипче пред два дена го образложил предлогот на Комисијата за заразни болести за враќање на работа на хронично болните.
„Тој нагласи дека ова нема да важи за оние пациенти кај кои лекарот специјалист ќе укаже дека има состојба на влошување во рамките на хроничната болест и бара некаков акутен третман, а претставува и дополнителен ризик по здравјето на пациентот. Воедно, Филипче информираше дека соодветната процена за здравствената состојба на пациентот треба да ја направат лекарите специјалисти, врз основа на нивната стручност и експертиза“,
потсетуваат од Министерството.
Средбата ќе се одржи со претставници на здруженијата: „Борка“, „Живот со предизвици“, за помош и поддршка на лицата со мултиплекс склероза, за хронична миелоична леукемија, Сојузот на здруженија на дијабетичари на Македонија, Нефрон, Хепар центар, „Пеперутка“ и Алијанса на пациентски организации – АПО.
Дел од нивните барања се лицата што се со најголем ризик од смртност од ковид-19 да останат ослободени од работа, списокот со најризичните хронични болести да биде доставен од соодветните клиники, а враќањето на работа да се одвива според одредени критериуми.