Како што најавува министерот за здравство, во наредните денови дополнително ќе се дискутира и ќе се донесе одлука за родителите на деца до 10 години кои сега се ослободени од работа
По препораката на Комисијата за заразни болести хронично болните да се вратат на работа, освен лицата кои имаат извештај од специјалист за влошување на болеста, министерот за здарвство Венко Филипче изјави дека се разгледувале повеќе аспекти кога го дискутирале тоа прашање.
Не станува збор за ад хок одлука, посочи министерот, туку е резултат на дискусија што ја водиме на повеќе состаноци повеќе од три недели.
„ Суштината е дека практично за сите економски оператори, за сите компании и сите организации има протоколи по кои се работи. Премногу е широка листата во наши услови на хронични болести, луѓе кои имаат практично сосема нормални животни активности и никако не се доведуваат во ризик доколку ги почитуваат протоколите на своите работни места. Во таа смисла е донесена одлуката да се даде препорака пациентите кои имаат дијагноза ‘хронична болест’ и оние кои имаат малигни болести, да се вратат на своите работни места. Нема да одат на работа само тие кај кои лекарот специјалист ќе укаже дека има состојба што се вика егзацербација, односно влошување во рамки на хроничната болест кое бара некаков акутен третман, а притоа и е дополнителен ризик по здравјето на пациентот. Тоа е препораката, оставаме на стручноста, експертизата на лекарите специјалисти да направат соодветна проценка“,
објаснува Филипче.
Според него, најризичните категории и натаму остануваат заштитени.
Во однос на препораката трудниците да бидат ослободени од работа, Филипче посочи дека тие се категорија за која се уште нема доволно стручни сознанија како и дали вирусот можеби влијае на развојот на плодот и од претпазливост за нив се продолжува и со оваа мерка.
– Сметаме дека кај родилките е доволен ризик фактор пуштањето на останатите возрасни групи во градинките и за оваа категорија може да се почека, може да се обезбедат и средства преку Министерството за труд и социјална политика што ќе се трансферираат во Фондот за здравствено осигурување за исплата. Ова е категорија која и понатаму ќе ја мониторираме до Нова година, па ќе видиме каква ќе биде сост ојбата“,
рече Филипче.
Како што додаде, во наредните денови дополнително ќе се дискутира и ќе се донесе одлука за родителите на деца до 10 години кои сега се ослободени од работа.