Денеска почнува постапката за набавка на брзи тестови со дел од буџетот кој со ребалансот стигна во Министерството за здравство.
Владата на седницата пред 10 дена го задолжи Министерството за здравство да спроведе постапка за јавна набавка на брзи антигени тестови за потребите на јавните здравствени установи со спроведување постапка на преговарање без објавување оглас.
При оваа одлука Владата се повика на членот 55 став (1) точка 6) од Законот за јавните набавки, според кој оваа постапка може да се спроведе „доколку поради крајна итност, предизвикана како резултат на настани кои договорниот орган не можел да ги предвиди, роковите за другите постапки не може да се применат“.
Во меѓувреме, земјава доби 20 000 теста од донација од кои 13 000 се веќе поделени и се користат во многу здравствени установи во земјава.
Уште 6 000 во овој момент има во резерва и има план каде да се дистрибуираат во текот на следната недела.
Во однос на конкретни препораки за лекување заболени од ковид-19 и во однос на користење терапија, Филипче рече дека има унифициран пристап, при што воопшто не се препорачуваат лековите кои не се докажани дека помагаат за ова болест.
Тој посочи дека матичниот лекар прави проценка на здравствената состојба, индицира одредени анализи, преглед и врз основа на состојбата на пациентот препишува терапија. Доколку има потреба пациентите се упатуваат во болниците.
„До овој момент нема специфична терапија за ковид-19 никаде во светот. Нема ниту еден лек кој е потврден да биде специфичен за оваа болест. За лекот ‘фавипиравир’ се водат близу 30 студии во светот. Лекот ‘ремдесивир’ е неспецифичен за оваа болест, но има одредени докази дека влијае на скратување на периодот на хоспитализација, не на преживување. а доколку се укаже или се индицира потреба пациентите се упатуваат во болниците“,
рече Филипче на прес-конференцијата денеска одговарајќи на прашање дали една од причините за смртноста е што пациентите се лекуваат во домашни услови на несоодветен начин, а потоа се носат во болница кога е веќе доцна.