Полицискиот час дава резултати, смета министерот за здравство Венко Филипче и посочува дека на овој начин се спречило младите лица да го шират вирусот преку собири на јавни површини. На новинарското прашање за тоа кој е ефектот од забраната за движење од 22 до 5 часот, Филипче рече дека се спречил експоненцијален раст на нови заболени и наплив на пациенти во болниците.
„Целта на рестриктивните мерки беше да се ограничи движењето и комуникацијата на една критична категорија граѓани, кои како трансмитери беа идентификувани во делот на епидемиолошката слика, анкетите, а тоа беа помладите кои се собираа на јавни површини, паркови, после завршувањето на работата на угостителските објекти, и скоро секогаш без почитување на превентивните мерки, како носење маски и одржување дистанца. Во овој балансиран пристап со умерена рестрикција комбинирана со индивидуална одговорност, резултатот дојде во смисла што немаше експоненцијален раст на заболени од вкупниот број на направени тестови и немаше нагол прилив кон болниците за да се парализира здравствениот систем. Тоа успеавме добро да го изменаџираме, имаме доволен број на кревети кога споредуваме со пикот во ноември…Во таа смисла избегнувањето на експоненцијалниот раст, и тоа што имаше многу други земји кои имаа многу порестриктивни мерки и се соочија со многу посилен бран од нашиот, како едно сценарио, и друго сценарио да после таквиот раст воведување на некаква форма на карантин не даде резултат, Комисијата за заразни болести смета дека ова е пристапот којшто треба да биде“,
рече Филипче.
Коментирајќи го зголемувањето и на смртните случаи од ковид-19, Филипче рече дека тоа тренд и во другите земји.
„Тоа се случува секаде и во светот и насекаде во регионот. Има земји коишто имаат многу поголема смртност од нашата. Дури и некои земји овде во регионот како Бугарија, Босна, Словенија… Секогаш кога има нов бран и зголемен број на случаи, се случува да расте и смртноста и ние не сме исклучок, тоа е така насекаде. Тоа што можам одговорно да го кажам е дека координација со сите директори, инфектолози, интернисти, им се пристапува на сите пациенти максимално професионално“,
рече Филипче.