Сето ова време се работеше исклучително професионално и во интерес на јавното здравје, никогаш во интерес на политиката, вели министерот за здравство
Министерот за здравство Венко Филипче денеска упати апел да не се политизира работата на Комисијата за заразни болести во контекст на препораките што би ги дале здравствените работници околу тоа дали и кога би имало услови за одржување на изборите.
На прашање дали е разговарано за избори, Филипче посочи дека заклучно со денешниот состанок на Комисијата не станало збор на оваа тема.
„Приоритет е заштитата на здравјето во смисла на димензионирање на мерките исклучиво согласно бројот на новодијагностицирани, нивната поврзаност, кластерите…
рече Филипче, додавајќи дека каква било мерка или препорака да биде донесена тоа ќе биде исклучиво врз основа на сознанијата и податоците за новодијагностицирани пациенти.
Тој повтори дека не гледа никаква потреба да се политизира работата на Комисијата за заразни болести која, како што рече, од самиот почеток работи исклучиво во интерес на јавното здравје, а не во интерес на политиката.
„Сите овие недели и месеци се работеше исклучително професионално и во интерес на јавното здравје на граѓаните, никогаш во интерес на политиката и така и ќе биде во иднина. Сакам да упатам јасна порака до граѓаните дека треба и мора да бидат спокојни околу тоа прашање заради тоа што целокупната работа, носењето, предлагањето на мерките се носи согласно состојбите, согласно анализите, бројките на новодијагностицирани пациенти, спроведувањето на мерките, почитувањето од страна на граѓаните. Така ќе биде и во иднина“,
порача Филипче.
Деновиве, повеќе политички субјекти излегоа со ставови дека Комисијата за заразни болести треба да оцени дали има услови за одржување избори, односно дали се смирува епидемијата со коронавирусот. Лидерот на ВМРО-ДПМНЕ Христијан Мицкоски, пак, денеска ги предупреди Филипче и членовите на Комисијата да постапуваат стручно и според лекарската етика, а не, како што рече, според желбите на Зоран Заев, Радмила Шелеринска и на СДСМ. Претходно, Филипче најави дека утре Комисијата ќе разговара и околу изборите, ама пред се околу можното релаксирање на ограничувањата.