Зголемениот број новозаболени од ковид-19 е варијација која се должи на мал кластер во една од конфекциите во Штип, објаснува министерот за здравство Венко Филипче коментирајќи ги бројките од пред два дена, кога за 24 часа беа дијагностицирани 241 нов случај.
„Една од неколкуте конфекции во кои имаше поголем број заразени е веќе затворена, таму каде што се најдени спорадични случаи вчера во координација со градоначалникот ќе зборуваме со сопствениците, за да видиме дали според епидемиолошките анкети има потреба и тие да се затворат за да се намали ризикот од пренос на вирусот“,
вели Филипче во гостување на Канал 5.
Филипче појасни дека високата бројка не е тренд, туку варијација затоа што јасно е идентификуван бројот на ново дијагностицирани пациенти и јасно е утврдено од каде потекнува изворот и трансмисијата на вирусот.
„Во таа смисла, вкупната бројка кога тоа ќе се изземе, е она што е тренд сите овие изминати денови односно целиот изминат период. Еден одреден процент, константен, во однос на вкупниот број на ново дијагнсотицирани отпаѓа на град Скопје, сите други ширум државата“,
вели тој.
Во однос на пост изборните собири, но и забавите по клубовите, Филипче потенцираше дека постојат протоколи за секој настан, секоја организација, без разлика дали е на отворено или на затворено.
„Сите мора да се свесни дека тоа е новиот начин на функционирање. И во затворена просторија кога се организираат едукации, полагања испити итн, се седи на дистанца се носат маски. На отворено капацитетите се најмногу 50 отсто исполнети, со јасно обележани места каде треба да стојат луѓето. И на отворено кога има концентрација на луѓе мора да се носат маските”
рече Филипче.
Тој посочи дека мора да има поголеми контроли дали се почитуваат мерките и протоколите, затоа што, како што вели, единствена друга мерка што преостанува е рестрикцијата во движењето.