Засега нема потреба од дополнителни рестрикции, како полициски час или карантин, на цела територија или во одредени региони, повтори денеска министерот за здравство Венко Филипче и додаде дека вчерашната мерка за ограничување на групирањето преку целиот ден (на не повеќе од 4 лица) на јавните површини треба да придонесе да се намалат контактите.
„И покрај апелите, имаше собири на јавни површини, како паркови за време на викендите. Исто така, бевме сведоци дека кога се затворија угостителските објекти, луѓето се групираа пред угостителските објекти. Сакаме да го спречиме тоа, да станат свесни и да не се групираат. Сметаме дека овие мерки се доволни, и ако се почитуваат ќе дадат резултати“,
рече Филипче.
Овие мерки, повтори Филипче, нема да важат за пазарите, во јавниот превоз, спортските натпревари и настани на отворено и на затворено за кои има протоколи за исполнетост до 30 отсто од капацитетот.
Засега не се планира ниту воведување карантин во регионите, но ситуацијата се следи и тоа ќе биде една од опциите ако има потреба. Не се планира ниту ограничување на движењето меѓу регионите и забрана за меѓуградски и меѓуопштински превоз.
„Ова е тежок и комплексен период и сите мора да сме свесни да ги почитуваме мерките, да не се групираме, да не излегуваме без голема потреба од дома. Болничките капацитети се преоптоварени, кадарот исто така“,
апелира повторно Филипче.