Во гостувањето во емисијата „360 степени“ на МРТ 1, новинарките Ана Петрушева и Оливера Трајковска анализираа како трагедијата во Нови Сад ја прели чашата, по што дигиталната генерација со теренска кампања ги разбуди граѓаните и го промени политичкиот пејзаж во Србија
Во најновото издание на емисијата „360 степени“ на МРТ 1, новинарките Оливера Трајковска и Ана Петрушева ги анализираа изборите во Србија, на кои Александар Вучиќ и неговата СНС претрпеа пораз од студентската листа.
На прашањето за тоа како барањето правда по трагедијата во Нови Сад со падот на настрешницата на железничката станица, при што загинаа 16 луѓе, успеа да прерасне во масовно движење кое доведе до смена на власта, директорката на БИРН Македонија, Ана Петрушева, посочи дека тоа било само последната капка што ја прелила чашата по децениски скандали и афери.
„Власта успеваше да се извлече со тоа што, иако имаше доволно докази, луѓето практично гледаа како мафијата презема делови од државата, а власта ги убедуваше дека сето тоа што го гледаат и што го слушаат и за што ги имаат докази, не е точно. И исто беше и со настрешницата. Веднаш по таа трагедија следуваа доста лаги, доста пропаганда дека настрешницата не била никогаш реконструирана…“,
рече новинарката Петрушева.
Прашана – што е тоа што ѝ успеа на студентската листа, а со години не им успеваше на партиските опозиционери во услови на контролирани медиуми и институции, Петрушева објасни дека младите примениле сосема поинаков пристап.
„Она што децата го сменија, односно студентите, е што влегоа во секој дом. Тие буквално го посетија секое село, секој град ја ‘исшпартаа’, да кажеме, Србија до најоддалечените точки и на тој начин ги разбудија сите оние каде што дотогаш владеела успешно пропагандата. Значи вие го имате од една страна Вучиќ, којшто имаше едно од своите предизборни обраќања беше пренесувано на 46 телевизии, и имате генерација која е тотално дигитална и којашто функционира само преку социјалните мрежи со еден сосема поинаков тип на комуникација“,
рече Петрушева.
Новинарката и авторка на емисијата „Вин-вин“, Оливера Трајковска, сподели податок дека околу 900 илјади луѓе до 35-годишна возраст гласале за студентската листа, опишувајќи го овој феномен како ситуација во која „индустриската политика загуби од органското производство“. Според неа, овие избори се всушност победа и над самата српска опозиција, која ниту умеела, ниту знаела како да излезе од стариот начин на функционирање.
„Не е прашањето зошто немаше одговорност за 16 жртви оти Србија во целиот овој период имаше многу повеќе жртви, во физичка смисла жртви. Туку можноста да почне да се гради пристојност на зборот и доверба во зборот. Тоа е веројатно првпат, ако е надвор од тој класичен политички речник“,
истакна Трајковска.
Како клучна тактика на студентите, соговорничките го посочија нивниот пристап кон Вучиќ, кому директно му порачале дека тој (како претседател на државата) не е надлежен за нивните барања, инсистирајќи на реакција исклучиво од институциите. Тие, според Петрушева и Трајковска, успеале да ги убедат граѓаните дека нивниот глас е важен и дека може да доведе до реална промена.