Министерот за здравство, Венко Филипче, рече дека се радува на ставот на новиот поглавар на Исламската верска заедница, Шаќир Фетаху, бидејќи неговите пораки до верниците се значајни за подигање на свеста.
„Неговите пораки упатени до верниците дека коронавирусот е сè уште тука се значајни за подигање на свеста кај граѓаните. Поглаварот посочи дека вирусот е опасен и брзо се шири и побара од своите верници да ги почитуваат мерките за заштита и препораките на стручните лица, со што покажа одговорност кон состојбата во земјата“,
напиша Филипче на Фејсбук.
Министерот смета дека е исклучително важно сите чинители во општеството да се вклучат во борбата со коронавирусот.
„Секој во својот круг на делување може да влијае на свеста на граѓаните и да укажува дека само со почитување на мерките можеме да ја надминеме оваа состојба“,
смета Филипче.