Тој најавува инклузивна кампања во која ќе има многу средби и дискусии со членството и симпатизерите за да ги слушне нивните размислувања и идеи и нагласува дека ќе води кампања со највисока почит кон своите противкандидати
Поранешниот министер за здравство Венко Филипче и официјално објави дека ќе поднесе кандидатура за претседател на СДСМ.
Филипче, кој беше носител на пратеничката листа на СДСМ и коалицијата во четвртата изборна единица, во објава на својот фејсбук-профил ги повика членовите и симпатизерите на партијата да му се приклучат во намерата за обновување, реформирање и повторно издигнување на СДСМ.
„Мојата цел во следните четири години е да ја обновиме, реформираме и повторно да ја подигнеме СДСМ на ниво кое го заслужува. Да создадеме организација која ќе им служи на граѓаните и ќе биде мотор на општествениот напредок“,
пишува Филипче.
Тој наведува дека СДСМ се соочува со голем предизвик и поминува низ најтешките моменти по поразот што го доживеа на парламентарните избори што се одржаа на 8 мај. Сепак, додава тој, поразот треба да послужи како моќен катализатор за промени и обнова.
„Мораме да учиме од нашето минато, да ги отстраниме сите недостатоци и да излеземе посилни и пообединети од кога било досега. СДСМ отсекогаш бил и останува столб на демократијата, правдата и напредокот. Силен СДСМ им е пред сѐ потребен на граѓаните како коректив на политиките и насоката во која се движи земјата“,
наведува Филипче на Фејсбук.
Тој најавува инклузивна кампања во која ќе има многу средби дискусии со членството и симпатизерите за да ги слушне нивните размислувања и идеи и нагласува дека ќе води кампања со највисока почит кон своите противкандидати.
„Сите ние сме пред сѐ пријатели и колеги и имаме заедничка цел – посилен и подобар СДСМ. Ова мора да биде натпревар на идеи и визии, а не бојно поле на лични напади. Нашата заедничка цел е да го зајакнеме СДСМ и да им служиме на граѓаните, затоа мора да пристапиме со единство и меѓусебно почитување“,
вели Филипче.
Во таа насока, Филипче упатува покана до своите колеги кандидати за претседателската функција во СДСМ за средба на која ќе ги договорат правилата на фер и демократска кампања во која, како што наведува, на крајот сите ќе излезат и помудри и пообединети.
На парламентарните избори што се одржаа на 8 мај, Филипче беше носител на листата во четвртата изборна единица каде што СДСМ доби пет пратенички мандати.
Филипче на 22 мај објави дека, како што ветил во предизборието, ќе има средби со членовите на СДСМ и граѓаните низ целата држава. Првата средба ја имаше во Неготино од каде што рече дека на членовите и активистите им ветил дека заедно ќе ја вратат партијата на победничките патеки.
Досега кандидатури за лидер на СДСМ најавија дека ќе поднесат досегашната министерка за одбрана Славјанка Петровска и директорот на Дирекцијата за технолошко-индустриски развојни зони (ТИРЗ), Јован Деспотовски.
Такви амбиции во јавноста покажа и Стефан Богоев, актуелен директор на Царинската управа, но тој не потврди дека ќе се кандидира.
Од петокот трае отворениот повик за самокандидирање на сите заинтересирани кандидати за претседател на Социјалдемократскиот сојуз на Македонија (СДСМ). Повикот ќе биде отворен до четврток, 6 јуни.
Право на кандидатура имаат сите членови на партијата кои ги исполнуваат критериумите и високите вредносни, морални и етички норми.
За кандидат за претседател на СДСМ може да се кандидира лице со најмалку 5 години членство во СДСМ кој најмалку еднаш бил избран од страна на конгресот на СДСМ за член на некој од органите на партијата.
Изборите ќе ги спроведе Централна изборна комисија заедно со 80 општински изборни комисии и Одбори на избирачки места на локално ниво.
Од денеска, пак, сите активни членови на СДСМ имаат можност да се регистрираат преку онлајн алатката за активна регистрација која е достапна на интернет страницата на СДСМ, а втората опција за регистрација е преку општинските организации на СДСМ.
Внатрепартиските вонредни избори за претседател на СДСМ доаѓаат откако Димитар Ковачевски, по парламентарните избори на 8 мај, официјално го потврди своето повлекување од претседателската функција во партијата.