Министерот за здравоство, Венко Филипче, вели дека мора да се казнат одгворните што на концертот на Петар Грашо во Хераклеа, Битола не се почитувале мерките.
„Организаторот на настанот е должен да обезбеди задолжително присуство на редарска служба која ќе го контролира спроведувањето на протоколите и наведените мерки, со право да го отстрани секој посетител кој истите нема да ги почитува. Грижата за колективното здравје е заедничка одговорност, која во овој случај треба да ја понесе организаторот на настанот. Ги повикувам надлежните веднаш да реагираат и соодветно да ги санкционираат одговорните“,
вели Филипче.
Тој вели дека повеќепати како министер и заедно со Комисијата за заразни болести се сретнувале со организаторите на концерти и настани со цел да ги утврдат протоколите за работа.
„Не можам да го премолчам еклатантното прекршување на протоколите на концертот на Петар Грашо во Хераклеа во Битола. Комисијата за заразни болести и јас лично во текот на јуни имав неколку средби со организаторите на настани на кои заедно ги утврдивме сега веќе усвоените протоколи, а според кои меѓу другото, настаните се одржуваат единствено на отворено, со максимум 50% публика од предвидениот капацитет, задолжителна дистанца меѓу посетителите од 1,5 м, задолжително носење на маска и дезинфекција на раце и мерење на температура на влез за секој посетител“,
вели Филипче.
Концертот на хрватскиот пејач се одржа на 20 август во Хераклеа, а како организатор на истиот се јавува извесна фирма од Скопје.