Во изминатите 24 часа во Индија е регистриран рекорден дневен број на новоинфицирани од коронавирусот – 168 912, покажуваат податоците на индиското Министерство за здравство
Втората по бројност држава во светот – Индија, деновиве доживеа драматичен раст на случаите на заразени со коронавирус, по повеќенеделните верски фестивали, изборни митинзи и релаксиран пристап кон носењето маски, јавуваат светските агенции.
Индија веќе го мина Бразил по бројот на потврдени случаи на коронавирус и сега е зад САД, на второто место во светот според регистрирани случаи на инфекција.
Во изминатите 24 часа во Индија е регистриран рекорден дневен број на новоинфицирани од коронавирус – 168 912, покажуваат податоците на индиското Министерство за здравство.
Од почетокот на пандемијата во Индија се потврдени вкупно 13,53 милиони случаи на коронавирус, додека тој број, според Универзитетот „Џон Хопкинс“, изнесува 13,48 милиони.
Во исто време од заразата починале вкупно 170 179 лица, со што Индија е на четврто место во светот според бројот на жртви на коронавирус, зад САД, Бразил и Мексико.
Владата очајнички се обидува да избегне втора блокада, но многу држави почнаа со воведување построги мерки.
Во најтешко погодената држава Махараштра и нејзиниот главен град Мумбаи, рестораните се затворени, а забранети се јавни собири на повеќе од пет лица.