Наскоро ќе започнат да работат три фабрики за производство на вакцината во САД и три во Европа, со што двојно ќе се зголеми бројот на дози предвидени за оваа година
„Фајзер“ и неговиот германски партнер „Бионтек“ до крајот на 2020 година, произвеле над 70 милиони дози од својата вакцина против ковид-19, соопшти денеска извршниот директор на „Фајзер“, Алберт Бурла.
Во интервју за Си-Ен-Би-Ес, тој рече дека до последната недела од 2020 година се произведени повеќе од 70 милиони дози, при што распределени се околу 50 милиони дози.
„Потоа произведовме уште вакцини во првата недела од јануари. Во моментов мислам дека дистрибуиравме 33 милиони дози, а половина од она што го произведовме е на полиците“,
рече Бурла.
Германската фармацевтска компанија „Бионтек“, која заедно со американската компанија „Фајзер“ ја разви вакцината против вирусот, вчера соопшти дека очекува до крајот на годината да бидат произведени две милијарди дози.
Угур Сахин, извршен директор на компанијата, рече дека наскоро ќе започнат да работат три фабрики за производство на вакцината во САД и три во Европа, со што двојно ќе се зголеми бројот на дози предвидени за оваа година.
Вакцината на „Фајзер/Бионтек“ е првата која доби одобренија во повеќе држави во светот и засега е најкористена во САД, Британија и во ЕУ.