На средбите со домаќините, заменик-претседателката на Владата и министерка за надворешни работи на Словенија, разговарала за евроинтеграцискиот пат на Северна Македонија кон ЕУ, за предизвиците од економската и енергетската криза, како и за претстојното потпишување на договорот со Фронтекс на македонски јазик
Заменик-претседателката на Владата и министерка за надворешни работи на Словенија, Тања Фајон при денешната посета на Северна Македонија оствари средба и со претседателот Стево Пендаровски, како и со спикерот Талат Џафери и со вицепремиерот за економски прашања, координација со економските ресори и инвестиции Фатмир Битиќи.
Фајон на средбите со домаќините разговарала за евроинтеграцискиот пат на Северна Македонија кон ЕУ, за предизвиците од економската и енергетската криза, како и за претстојното потпишување на договорот со Фронтекс на македонски јазик.
Претседателот Пендаровски се заблагодарил за силната словенечка поддршка за македонските интеграции во Европската Унија. На средбата, како што информираат од претседателскиот кабинет, соговорниците споделиле мислења и информации за извештајот на Европската комисија и оцениле дека тој е јасен патоказ за понатамошно спроведување на домашните реформи.
„На средбата се разговараше и за предизвиците од енергетската и економска криза, војната во Украина, како и регионалната соработка, европската и евроатлантската перспектива на Западен Балкан“,
додаваат од кабинетот на Пендаровски.
Првиот парламентарец Џафери на Фајон и се заблагодарил за континуираната поддршка на Република Словенија во остварувањето на двете државни стратегиски цели, членството во НАТО и во ЕУ во изминатите децении.
„Џафери ја информираше за актуелниот процес на скрининг, на кој претходеше процесот на консултации и став на Собранието кон Владата за почитување на идентитетските особености на македонскиот народ и решавањето на билатералните прашања надвор од кластерите во текот на преговорите“,
информира собраниската прес-служба.
На средбата станало збор и за целосното усогласување на државата со надворешната, безбедносната и одбранбената политика на ЕУ, како јасен показател за безусловните заложби и посветеноста на нашиот пат кон членство во Унијата.
Фајон на средбата ја потврдила личната и државната определба за целосна поддршка на земјата на сите полиња од взаемен интерес. Истовремено, таа ги истакнала потенцијалите кои постојат за соработка на билатерален план како на полето на економијата и образованието, особено во период на глобални промени кога се повеќе од потребни мерките за солидарност и заедничко дејствување.
Соговорниците го поздравиле претстојното потпишување на договорот со Фронтекс на македонски јазик, со кој, постојните стравови се потврдуваат како неоправдани.
На средбата, пак со вицепремиерот за економски прашања, координација со економските ресори и инвестиции Фатмир Битиќи Фајон разговара за пристапните преговори на Северна Македонија со Европската Унија, како и кон моменталната енергетска криза и справувањето со истата.
Македонскиот вицепремиер Битиќи, како што информира владината прес служба, се заблагодарил за целата поддршка која Словенија, но и самата Фајон ја дава за нашата земја на нашиот пат кон евроинтеграциите.
Двајцата вицепремиери зборувале за развојот на регионалната соработка преку инвестиции и зголемување на конкурентноста. Битиќи ја потврдил важноста на словенечките компании кои инвестираат во нашата земја и кои носат додадена вредност на нашата економија.
Министерката ја потврди и заложбата на Европската комисија за поддршка на земјите од Западен Балкан за излез од енергетската криза, со позитивен став дека Брисел ќе донесе позитивна одлука за финансиска поддршка.