Откако земјите членки на ЕУ ќе се усогласат со текстот, ротирачкото претседателство со Советот на ЕУ ќе ја претстави усогласената позиција на Унијата на првата меѓувладина конференција, со што ќе се означи формалниот почеток на преговарачкиот процес кога и ќе се обелодени содржината на преговарачките рамки за Северна Македонија и за Албанија
Европската комисија ја усвои Предлог-преговарачката рамка за земјава. Тоа значи дека документот според кој ќе се водат преговорите за членство со Северна Македонија се наоѓа кај земјите-членки на ЕУ кои ќе треба да ја одобрат финалната верзија. Според проценките, предлог-рамката веќе идната седмица ќе се разгледува во Брисел меѓу земјите-членки.
Предлогот што го изготви тимот на еврокомесарот за проширување, Оливер Вархеји, се темели на новата методологија за пристапување. Според шефот на дипломатијата, Никола Димитров, со овие измени процесот ќе биде поизвесен, поконкретен, поверодостоен, подинамичен, со засилено политичко управување од страна на земјите-членки, темелено на објективни критериуми и строга и позитивна и негативна условеност, но и реверзибилност на процесот ако земјата кандидатка не ги исполнува задачите и назадува во европската агенда.
„Суштината на предложената Преговарачка рамка, за којашто, според последните информации, веќе следната недела во Брисел ќе се разговара од страна на земјите членки на експертско работно ниво, е европските стандарди да си ги донесеме дома. Пред се, демократските принципи и вредности поврзани со владеењето на правото, како и економските реформи. Мислам дека има убава симболика што ЕК ја заврши својата задача врз основа на одлуката од март, токму на 1 јули, денот кога претседавањето со Советот на ЕУ го презема Берлин и јас сум убеден дека како што беше за нас историско хрватското претседателство, така ќе биде и германското претседателство и заедно со германската поддршка во следниве месеци ќе ја отвориме првата меѓувладина конференција“,
изјави Димитров.
Со првата меѓувладина конференција почнува преговарачкиот процес, по завршување на т.н. скрининг и отворањето на првиот кластер – Основни вредности, кој ги опфаќа клучните реформски области од Поглавјето 23 – правосудство и фундаментални права, Поглавјето 24 – правда, слобода и безбедност, економските критериуми, функционирањето на демократските институции, реформата на јавната администрација, Поглавјето 5 – јавни набавки, Поглавјето 18 – статистика и Поглавјето 32 – финансиска контрола.
Еврокомесарот Вархеји порача дека денешниот ден претставува значаен чекор во патот на Северна Македонија и Албанија кон ЕУ.
„Исполнувајќи ја нашата обврска, ние исцртавме конкретни рамки за спроведување на пристапните преговори. Нашиот предлог се темели на ревидираната методологија за проширување што ја претставивме во февруари. Со нетрпение ги очекувам разговорите со земјите членки, како и одржувањето на првите меѓувладини конференции со двете земји. Нивната иднина јасно лежи во ЕУ и уверен сум дека ќе продолжат да ги исполнуваат европските реформи, како што тоа го правеа и досега“,
изјави Вархеји.
Откако Комисијата ја предложи Преговарачката рамка, процесот е следен: документот се разгледува меѓу земјите-членки и се договара финалната верзија. Откако сите членки ќе се согласат со текстот, ротирачкото претседателство со Советот на ЕУ ќе ја претстави усогласената позиција на Унијата на првата меѓувладина конференција, со што ќе се означи формалниот почеток на преговарачкиот процес кога и ќе се обелодени содржината на преговарачките рамки за Северна Македонија и за Албанија.
Очекувањата во Скопје се дека тоа ќе се случи во наредните 6 месеци за време на германското претседателство со Советот на ЕУ. Денеска Берлин и формално го презеде претседавањето од Загреб. На заедничката прес-конференција во Берлин, шефовите на германската и на хрватската дипломатија, Хајко Мас и Гордан Грлиќ Радман, изразија очекување дека меѓувладините конференции за земјава и за Албанија ќе се одржат до крајот на годинава.
„За нас е важен фактот дека за време на хрватското претседателство се донесе одлука за старт на пристапните преговори со Северна Македонија и со Албанија. Ние сакаме да се надоврземе на таа одлука и би инсистирале за време на нашето претседавање со Советот да се одржат меѓувладините конференции со двете земји“,
изјави шефот на германската дипломатија Мас на денешната прес-конференција.