Мерките за спас, според ЕФН, треба меѓу другото да вклучуваат зголемени фондови за јавните сервиси, директна финансиска помош за редакциите и субвенции дистрибуирани преку независно тело
Претставници на Европската федерација на новинари (ЕФН) се сретнаа со потпретседателката на Европската Комисија (ЕК), Вера Јурова, и побараа пакетите за спас од економската криза што ги подготвува ЕК да вклучуваат посебни мерки за помош за медиумскиот сектор, јави МИА од Брисел.
ЕФН ги повика сите институции на ЕУ да преземат брзи и координирани мерки за да му помогнат на медиумскиот сектор да се справи со “катастрофалните социјални и економски последици од кризата со ковид-19“.
„Пред оваа пандемија, европските земји повеќе од кога било имаа потреба од професионални и економски безбедни новинари. ЕУ треба да преземе акции и да ги охрабри земјите членки да го сторат истото, порачаа од Федерацијата, по средбата со Јурова.
Европската Комисија подготвува разни мерки и пакети за спас од економската криза која ќе следи по здравствената.
„ЕУ и национални пакети за закрепнување се итно потребни за да се заштитат работните места и егзистенцијата на медиумските работници, да се поддржат компаниите и да се финансираат медиумите од јавниот сервис за време на оваа криза. Илјадници медиумски работници веќе изгубија работа или ризикуваат да ја изгубат, привремено или трајно“,
велатод Федерацијата на европски новинари која застапува 320 илјади новинари во и надвор од ЕУ, вклучително и македонските.
Директорката на ЕФН, Ренате Шредер, смета дека, наместо намалување на даноците за компаниите и на социјалните придонеси, потребни се таргетирани мерки кои ќе испратат повеќе новинари на терен.
Мерките за спас, според ЕФН, треба меѓу другото да вклучуваат зголемени фондови за медиумите од јавниот сервис, директна финансиска помош за редакциите и субвенции дистрибуирани преку независно тело, земајќи предвид објективни критериуми.
„Повеќе европски влади, како Данска и Шведска, преземаат економски мерки за олеснување на медиумскиот сектор, но повеќето сѐ уште не предложиле специфична помош. Некои земји, како Хрватска, намерно одбиваат специфична помош за медиумите, што најостро го осудувам“,
изјави генералниот секретар на Федерацијата, Рикардо Гутиерез.
Од Федерацијата потсетуваат дека предизвикот на борбата против лажните вести треба исто така да биде поттик да се поддржат професионалните медиуми, посебно во кризно време како сега.