Сепак, според Министерството, ситуацијата сè уште не е алармантна. Доколку бидат надминати праговите на алармирање за загаденоста на воздухот, од Министерството велат дека граѓаните и општините ќе бидат навремено информирани и во сила ќе стапат соодветните мерки
Откако денеска Скопје се искачи на високото трето место во светот според загаденоста на воздухот, Министерството за животна средина и просторно планирање (МЖСПП) преку соопштение информира дека е евидентно зголемувањето на ПМ 10 честички во воздухот и е надмината среднодневната гранична вредност од 50 микрограми на кубен метар на повеќе мерни места во земјава.
Сепак, според Министерството, ситуацијата сè уште не е алармантна. Доколку бидат надминати праговите на алармирање за загаденоста на воздухот, од Министерството велат дека граѓаните и општините ќе бидат навремено информирани и во сила ќе стапат соодветните мерки.
„Прагот на информирање на суспендирани честички со големина до 10 микрометри (надминување на вредноста од 100 микрограми на кубен метар во текот на два последователни денови) е надминат во Скопје на мерните места Центар и Лисиче и на мерните места во Гостивар, Прилеп, Кавадарци, Струмица, Кичево и Велес“,
велат од Министерството.
Во соопштението од Министерството се додава дека сите мерни станици од државниот мониторинг систем за квалитет на амбиентен воздух се во функција, но како што додаваат, повремено податоците од одредени мерни места не се достапни. Повремени падови на системите, како што додаваат оттаму, се предизвикани поради застареност на серверска опрема.
„Во моментот новата серверска опрема е набавена и инсталирана и во тек е мигрирање на системите и базите од стара на нова серверска опрема. Додека се врши миграцијата, можни се привремени прекини или недостапност до одредени сервиси во текот на следните неколку дена за што навремено ја известивме јавноста преку нашата веб-страница и социјалните мрежи на МЖСПП“,
се вели во соопштението и се додава дека се прават напори во најскоро време сите сервиси да бидат достапни.
Податоците за загаденоста на воздухот коишто не ѝ биле достапни на јавноста, ќе бидат достапни ретроактивно.
Дополнително, од Министерството се посочува дека во податоците од мерните станици Карпош, Тетово, Струмица и Гевгелија во моментот не е возможен пристап.