Германскиот канцелар додаде, очигледно алудирајќи на Унгарија, дека обидите за поткопување на вредносните на Унијата со блокирање на нејзините надворешнополитички мерки нема да успее
Канцеларот Олаф Шолц денеска пред германскиот парламент истакна дека Европската Унија е обединета во својата поддршка за Украина, пренесува „Гардијан“.
Германскиот канцелар додаде, очигледно алудирајќи на Унгарија, дека обидите за поткопување на вредносните на Унијата со блокирање на нејзините надворешнополитички мерки нема да успеат.
„Секој што мисли дека може да ги поткопа вредностите на ЕУ, на кои се обврза секоја земја членка, со блокирање на нејзината надворешна и безбедносна политика, ќе соочи со неуспех“,
порача Шолц пред пратениците во Бундестагот.
Претходно оваа недела Будимпешта ги повлече своите приговори во врска со заемот на Европската Унија за Украина откако ЕУ делумно ја одмрзна финансиската поддршка за Унгарија, објави Ројтерс.
Европската Унија ги блокираше средствата од фондот на ЕУ наменети за Унгарија поради загриженоста на Унијата дека Будимпешта не спроведува кредибилни реформи во областа на владеењето на правото и борбата против корупцијата.
Поддршката за Украина, вклучително и санкциите против Русија, ќе остане на сила и ќе биде интензивирана се додека претседателот Владимир Путин ја продолжува својата војна против Киев, додаде Шолц.
„Никој не страда од руската војна како Украинците – и ние цврсто стоиме на нивна страна“,
рече тој.
Инаку, утрово главниот град на Украина беше цел на нов жесток воздушен напад од страна на руските сили. Градоначалникот на Киев објави дека рано утрово во центарот на украинскиот главен град се слушнале експлозии.
Според неговата изјава, експлозиите се слушнале во квартот Шевченковски каде веќе се испратени службите за итни случаи.
Репортерите на „Би-би-си“ исто така јавуваат дека утринава слушнале силни експлозии веднаш откако претходно се вклучиле сирените за предупредување за воздушен напад.
Претседателот на Украина, Володимир Зеленски денеска изјави дека украинските системи за противвоздушна одбрана собориле 13 беспилотни летала камикаѕи од иранско производство, кои го таргетираа главниот град Киев.
„Русија утрово започна со напади со 13 шахиди… сите 13 беа соборени од нашите украински системи за противвоздушна одбрана“, рече Зеленски во видео обраќањето на социјалните мрежи, притоа мислејќи на беспилотни летала од иранско производство за кои Москва е обвинета дека ги користи против цели во Украина.