Борел на својот твитер-профил објави дека е неприфатливо какво било намерно нарушување на европската енергетска инфраструктура и дека доколку се случи такво нешто ќе биде одговорено со силен и единствен одговор
Европската Унија изрази сомневање дека штетата предизвика на двата госовода Северен тек 1 и 2, што доведе до истекување на гас во Балтичкото Море, е намерно направена, односно дека станува збор за саботажа, јавуваат агенциите, пренесува регионалниот сервис на Радио Слободна Европа.
Високиот претставник на Европската Унија за надворешна политика Жозеп Борел денеска изјавил дека сите достапни информации покажуваат дека истекувањата се резултат на намерен чин.
Борел на својот твитер-профил објави дека е неприфатливо какво било намерно нарушување на европската енергетска инфраструктура и дека доколку се случи такво нешто ќе биде одговорено со силен и единствен одговор.
Damage to Nord Stream 1 & 2 are not a coincidence and affect us all.
— Josep Borrell Fontelles (@JosepBorrellF) September 28, 2022
All available information indicates leaks are the result of a deliberate act.
Deliberate disruption of European energy infrastructure is utterly unacceptable and will be met with a robust and united response. https://t.co/p32qR8TzOb
Сеизмолозите вчера соопштија дека регистрирале потреси од експлозии во Балтичкото Море, пред да бидат откриени невообичаените истекувања од двата гасовода кои водат од Русија до Германија.
Некои од европските лидери, како и стручни лица веднаш укажаа на можноста од саботажа, имајќи го предвид судирот со Русија околу енергенсите, а кој е предизвикан од војната во Украина.
Според информациите, ниту еден од двата гасовода не носел гас кон Европа во времето кога биле откриени истекувањата.
Високиот претставник на ЕУ за надворешна политика рекол дека Унијата ќе ја поддржи истрагата за случајот и дека ќе преземе натамошни чекори за зголемување на отпорноста и енергетската безбедност на ЕУ.
Данската премиерка Мете Фредериксен изјави дека постои јасна проценка дека станува збор за намерни акти, а не за несреќи.
„Но, нема информации кои би укажале кој би можел да стои зад тоа“,
навела Фредериксен отфрлајќи ги притоа сугестиите дека инцидентот бил напад врз Данска. Таа истакнала дека истекувањата се случиле во меѓународни води.
Претседателката на Европската комисија (ЕК), Урсула фон дер Лајен, вчеравечер на Твитер напиша дека разговарала со данската премиерка за саботажа на двата гасовода.
„Клучно е да се истражат овие инциденти и да се направи се да се расчистат околностите што довеле до нив. Секое намерно нарушување на европската енергетска инфраструктура е неприфатливо и ќе предизвика најостар можен одговор“,
рече Фон дер Лајен.
Spoke to @Statsmin Frederiksen on the sabotage action #Nordstream.
— Ursula von der Leyen (@vonderleyen) September 27, 2022
Paramount to now investigate the incidents, get full clarity on events & why.
Any deliberate disruption of active European energy infrastructure is unacceptable & will lead to the strongest possible response.
Данскиот министер за одбрана Мортен Бодсков денеска имал средба со генералниот секретар на НАТО, Јенс Столтенберг.
Портпаролот на Кремљ, Дмитриј Песков, истекувањето на гас го нарече „многу загрижувачка вест“. Операторот на „Северен тек“ наведе дека штетата е без преседан, а од „Газпром“ одбија да коментираат.