Борел вели дека Израел треба да се воздржи од дополнително влошување на и онака тешката хуманитарна ситуација во Газа и предупредува дека продолжувањето на офанзивата може да им наштети на односите меѓу Унијата и Израел
Високиот претставник на Европската Унија за надворешна политика и безбедност Жозеп Борел го повика Израел веднаш да ја прекине воената операција во Рафах.
Борел вели дека израелската офанзива на Рафах ја попречува испораката на хуманитарна помош и доведува до зголемување на бројот на раселените луѓе и изложеност на глад и човечко страдање.
„Навреден сум од повторените и сè уште неконтролираните напади на израелските екстремисти врз хуманитарните конвои на пат кон Газа, вклучително и од Јордан. Стотици илјади цивили гладуваат“,
пишува Борел на Икс.
I’m outraged by the repeated & still unchecked attacks perpetrated by Israeli extremists on aid convoys on their way to Gaza, including from Jordan. Hundreds of thousands of civilians are starving.
— Josep Borrell Fontelles (@JosepBorrellF) May 14, 2024
IL authorities must stop these operations & hold those responsible accountable.
Во изјавата шефот за надворешна политика на ЕУ вели дека Израел треба да се воздржи од дополнително влошување на и онака тешката хуманитарна ситуација во Газа. Тој предупредува дека продолжувањето на офанзивата може да им наштети на односите меѓу Унијата и Израел.
„Иако ЕУ го признава правото на Израел на самоодбрана, Израел мора да го стори тоа во согласност со меѓународното хуманитарно право и да обезбеди безбедност за цивилите“,
вели Борел.
Израелски воени претставници минатата недела соопштија дека нивните сили ја презеле контролата врз палестинската страна на преминот Рафах меѓу Појасот Газа и Египет, кој е клучна стратегиска точка и единствената порта за влез на хуманитарна помош во Појасот.
Борел тогаш изјави дека, и покрај јасните предупредувања од ЕУ, САД и други земји, решеноста на Израел да изврши копнена офанзива врз Рафах ќе доведе до смрт на уште поголем број цивили.