Амбасадорите на земјите членки на ЕУ синоќа ги отстранија Србија и Црна Гора од листата на земји за кои досега важеше препораката дека може да се патува, надвор од границите на Шенген. Оваа забрана ќе трае најмалку две недели, а е последица на влошената епидемиолошка состојба во овие две земји.
Отстранувањето на Србија и Црна Гора од листата на безбедни земји беше предлог на Германија, претседавач со ЕУ, а поддршка добила од Франција, Шпанија и Холандија.
Унгарија уште минатата недела соопшти дека од 15 јули воведува задолжителен 14-дневен карантин за патниците од Србија.
За ставање на САД на т.н. бела листа воопшто не станало збор поради наглиот пораст на случаите со ковид. Бил разгледуван и предлогот за отстранување и на Алжир и Мароко од оваа листа, но не е донесена одлука.
По исклучувањето на Србија и на Црна Гора, 13 земји ќе останат на листата на безбедни земји – Алжир, Австралија, Канада, Кина, Грузија, Јапонија, Мароко, Нов Зеланд, Руанда, Јужна Кореја, Тајланд, Тунис и Уругвај. И покрај тоа што и Кина е на листата, патувањата ќе бидат дозволени само ако кинеските власти дозволуваат и посетители од ЕУ. Условот за реципроцитет не се применува во случај на другите наведени земји.
Сепак, листата на ЕУ е предлог и земјите членки можат да одлучат и да не ја почитуваат.