Петков минатата недела кога го претстави владиниот состав од четири партии и коалиции, на новинарско прашање околу позицијата на Бугарија кон Северна Македонија, кажа дека таа останува иста. Но, смета дека и двете земји можат многу да добијат од добрососедството и тоа треба да се направи врз основа на добра комуникација и доста работа
Во ЕУ сѐ уште нема согласност за заклучоците за проширувањето пред утрешниот министерски состанок, а спорот меѓу Северна Македонија и Бугарија е една од главните пречки, но не е единствена, јави МИА од Брисел.
Доколку нема заклучоци ова би било втора година по ред како ЕУ не може да постигне согласност за оваа политика. Меѓутоа овој пат поголема е веројатност словенечкото претседателство да настапи со претседателски заклучоци и имиња на земјите кои ги поддржуваат, наместо како што беше лани воопшто да нема никакви заклучоци, јавува МИА повкувајќи се на брифинг од дипломати.
Несогласувања има и околу Турција и Босна и Херцеговина.
Што се однесува до македонско-бугарскиот спор, Софија на состанокот минатата недела инсистирала дека Северна Македонија „не ги исполнува критериумите за отпочнување на преговорите“, став кој не добил поддршка од другите 26 земји членки, ниту од Европската Комисија.
Опцијата за одвојување на Албанија од Северна Македонија „доби малку, односно никаква поддршка“, вели висок дипломат на ЕУ за МИА.
Како што дознава МИА од дипломатите присутни на разговорите на амбасадорско ниво, Бугарија се буни за повеќе формалности во заклучоците за Северна Македонија. Една проблематична точка за Бугарија е употребата на „долгото име“ – Република Северна Македонија, на што инсистира Софија.
Нацрт заклучоците на словенечкото претседателство го користат долгото име на сите земји од проширувањето во воведниот дел, потоа во остатокот од текстот се користи краткото име за сите (Северна Македонија, Србија, Албанија, итн.). Софија сака секаде да стои Република Северна Македонија, што е исто така неприфатливо за мнозинството земји членки. Се очекува краен компромис да биде употребата на долгото име за сите земји и во целиот текст, но не само за Северна Македонија, велат дипломатите.
Крупно барање на Бугарија е да се вметне повторно реченицата за почитувањето на Договорот за пријателство, како експлицитен дел од процесот на проширување за Северна Македонија. Иако билатералните договори се секогаш споменати во овие заклучоци, за мнозинството земји членки на ЕУ е неприфатливо тоа да биде вклучено како специфичен дел во преговорите за Северна Македонија, бидејќи е голем ризикот со тоа да се создаде преседан и да се билатерализира целиот процес на проширување, што е спротивно на духот на новата методологија за претпристапни преговори на ЕУ, објаснуваат за МИА дипломатите во Брисел.
Софија има проблем и со временската одредница која е вклучена во нацрт-заклучоците. Имено словенечкото претседателство смета дека во заклучоците треба да стои „преговори со Северна Македонија и Албанија оваа година“.
Разговорите сега се водат на повисоко ниво и утре министрите за европски прашања ќе разговараат на темата за да се постигне компромис за конечните заклучоци пред Самитот на ЕУ, што ќе се одржи в четврток и петок.
Доколку повторно нема заклучоци и словенечкото претседателство одлучи да поднесе само свои заклучоци со поддршка на одделни земји, Бугарија би можела да биде изолирана ако сите други 26 земји членки на ЕУ се потпишат на заклучоците на претседателството.
Разговорите на линија Софија – Скопје – Брисел продолжуваат и денеска и не се исклучува нови нацрт заклучоци до крајот на денот, велат дипломатите, кои во голем дел не губат целосно надеж за изнаоѓање решение за компромис во последен момент и отпочнување на преговорите со Скопје и Тирана пред 31 декември.
Она што Бугарија го истакнала на состаноцие во Брисел, веќе го соопшто привремената Владата минатата недела, со објаснување дека така ќе настапат на состанокот на Советот за општи работи, што ќе се одржи на 14 декември во Брисел.
Денеска во Софија во тек е вонредната седница на Националното собрание на која ќе се избира премиер на Бугарија и ќе се гласа за предложениот состав на новата коалициска влада. За премиер е предложен е Кирил Петков од „Продолжуваме со промените“.
На седницата пријавени се 227 од вкупно 240 пратеници.
Кандидатот за премиер на Бугарија, Петков во говорот пред пратениците истакна дека главен приоритет на идната влада ќе биде избегнување на поскапување на струјата за домаќинствата, диверзификација и брза изградба на интерконектор со Грција.
Петков посочи и дека приоритет на идната влада е надминување на кризата со ковид-19, нудејќи две опции: доброволна вакцинација и зелен сертификат. Тој наведе дека првата наредба што ќе ја издаде како премиер на Бугарија е само со зелен сертификат да може да се влезе во Владата.

Тој повика и на нулта толеранција за корупцијата и промена на правосудниот систем во земјата.
Според Петков денеска е важен ден за продолжување на промените во Бугарија. Промената на размислувањето и промена на власта.
Весникот „24 часа“ објави дека доколку Парламентот денеска ја одобри новата бугарска влада, Кирил Петков ќе го замени бугарскиот претседател Румен Радев како претставник на Бугарија на овогодишниот последен Европски совет в четврток во Брисел.
„По правило на Европските совети учествува премиерот на Бугарија, а по исклучок на нив присуствува претседателот кога во земјата има техничка влада. Досега се планираше Румен Радев да ја претставува Бугарија на последниот Совет за оваа година. Во Бугарија дури се шпекулираше дека инаугурацијата на новата влада ќе биде одложена за да може шефот на државата да го одбрани бугарското вето во Брисел за почетокот на преговорите за членство на Република Северна Македонија во ЕУ“,
наведува изданието.
Но, според „24 часа“, лидерот на „Промените продолжуваат“ и кандидат за нов бугарски премиер Кирил Петков сака тој да оди на заседанието на Советот и да преговара со другите европски лидери.
„Тој би дебитирал во Европскиот совет со новиот германски канцелар Олаф Шолц, кој минатата недела беше избран од Бундестагот. Ставот на Бугарија за Северна Македонија останува непроменет, објави во саботата Петков на претставувањето на предлогот за неговата влада. Сепак, таа позиција треба да се надгради за да биде од корист за двете земји, додаде кандидатот за нов премиер“,
потсетува весникот.
„24 часа“ наведува дека во Брисел Петков ќе мора да ја брани бугарската рамковна позиција за Северна Македонија одобрена од техничката влада, потсетувајќи дека минатата недела таа зазеде став дека Бугарија одобрува почеток на пристапните преговори на Албанија со ЕУ, но не и за Северна Македонија.
Петков минатата недла кога го претстави владиниот состав од четири партии и коалиции, на новинарско прашање околу позицијата на Бугарија кон Северна Македонија, кажа дека таа останува иста. Но, смета дека и двете земји можат многу да добијат од добрососедството и тоа треба да се направи врз основа на добра комуникација и доста работа.
„Бугарската позиција останува таква каква што е, но сакаме да ја надградиме. Не сакаме да продолжиме само со пароли од двете страни на границата, сакаме да седнеме заедно, тимови од различни сфери да работат и да одиме кон добрососедство. Но, истовремено ќе ги браниме и бугарските национални интереси“,
порача Петков.
Шефот на дипломатијата Бујар Османи пред три дена изјави дека не очекува да се случи раздвојување на Албанија и Северна Македонија на европскиот самит во декември на кој повторно ќе се разгледува дали двете земји ќе почнат преговори со Европската Унија.