Во случајот на Косово и Србија, се надеваме дека ќе се угледаат на односот меѓу Грција и Северна Македонија како на добар пример. Всушност, имаше голема симболика што средбата се одржа во Северна Македонија, земја која има добри односи и со Србија и со Косово, што е најуспешниот модел на меѓуетничка хармонија во регионот, рече Ескобар
Ескобар вели дека целосно и силно го поддржува процесот на пристапување и сака да ја види Северна Македонија како членка на ЕУ што е можно побрзо
Заменик-помошникот државен секретар на САД и специјален претставник за Западен Балкан, Габриел Ескобар, смета дека договорот меѓу Србија и Косово постигнат во Охрид во саботата е правнообврзувачки за двете страни и покрај тоа што на тој документ нема потпис ниту од едната ниту од другата страна.
„Овој договор е правнообврзувачки за двете страни, од секој аспект, и двете страни ќе бидат оценувани според нивните перформанси во однос на договорот. Тој договор ќе продолжи да биде основа на нашата политика за напредување и основа за европското инволвирање во регионот. Сега имаме обврски преземени од двете страни и оттука не е прашање до ставањето потпис, туку до преземањето обврска. Значи, станува збор за договор од секој аспект. Овој договор за нормализација е почетокот на помирување меѓу Србија и Косово и ќе треба уште многу работа да се заврши надвор од овој договор, имплементацијата треба веднаш да почне“,
рече Ексобар на денешниот онлајн брифинг во Брисел.
Ескобар ја посочи Северна Македонија како добар пример за тоа како се решаваат отворени прашања со соседите и ги повика Србија и Косово да се угледаат на овој пример.
„Во случајот на Косово и Србија, се надеваме дека ќе се угледаат на односот меѓу Грција и Северна Македонија како на добар пример. Всушност, имаше голема симболика што средбата се одржа во Северна Македонија, земја која има добри односи и со Србија и со Косово, што е најуспешниот модел на меѓуетничка хармонија во регионот. И оттука, имаше многу причини зошто токму Охрид беше избран и мило ми е што таму се одржа средбата и што беше успешна“,
нагласи Ескобар.
Според него, Северна Македонија, но и сите земји од Западен Балкан заслужуваат забрзан пат кон членството во ЕУ.
„Она што можам да го кажам е дека целосно го поддржуваме европскиот пат на Северна Македонија. Јас целосно и силно го поддржувам процесот и сакам да видам С Македонија да стане членка на ЕУ што е можно побрзо. Мислам дека сите земји од Западен Балкан заслужуваат забрзан пат кон членство во ЕУ. Моја порака до ЕУ е дека Западен Балкан е реон на можност, а не реон на опасност“,
додаде тој.
Во саботата доцна во ноќта, по дванаесетчасовната средба на српскиот претседател Александар Вучиќ и косовскиот премиер Албин Курти со високиот претставник на Европската Унија за надворешни работи и безбедност, Жозеп Борел, и специјалниот претставник Мирослав Лајчак, беше постигнат договор за Анексот за имплементација на Договорот помеѓу двете земји за нормализирање на нивните односи.
Борел по средбата рече дека Косово и Србија се договориле за Анексот за имплементација на Договорот за патот за нормализирање на односите меѓу Косово и Србија.
„Договоривме кога, кој и како тоа да се реализира. Во рамките на анексот, страните се согласија да ги исполнат сите членови од Договорот и да ги спроведат сите обврски без одлагање и со добра волја“,
рече Борел.
Борел рече дека Договорот и Анексот се сметаат за потврдени и дека ќе бидат објавени.
Претседателот на Србија, Александар Вучиќ, по средбата во Охрид изјави дека е постигнат некаков договор и дека се договорени неколку точки кои ќе станат дел од преговарачката рамка.
Косовскиот премиер Албин Курти изјави дека уставноста и законодавството се основните принципи на договорот, како и дека договорот за Заедницата на српските општини е постигнат порано, но и го обвини Вучиќ дека „бега од потпишување договор“ со Приштина.