Агенцијата ќе ги анализира сите собрани податоци за да се овозможи побрза употреба на вакцината. Инспекцијата во Русија во април ќе ги опфати и производствените и клиничките испитувања
Германија и Италија веќе најавија дека би можеле самостојно да ја набават руската вакцина доколку таа не биде одобрена во ЕУ
Европската агенција за лекови (ЕМА) следниот месец ќе испрати експерти во Русија за да ги проверат клиничките испитувања и производството на вакцината против коронавирус „спутник В“.
Според раководителот на одделот за закани по здравјето и стратегија за вакцинација Марко Кавалери, слична инспекција моментално се спроведува и за германската „кјурвак“ и за американската вакцина „новавакс“.
Агенцијата ќе ги анализира сите собрани податоци за да се овозможи побрза употреба на вакцината. Инспекцијата во Русија во април ќе ги опфати и производствените и клиничките испитувања.
„Тогаш ќе се обидеме да откриеме колку време ќе биде потребно за да ги добиеме сите податоци за евентуално одобрување на оваа вакцина“,
изјави Кавалеро за италијанската телевизија РАИ 3.
Во саботата гувернерот на Лацио, Никола Ѕингарети, соопшти дека во следните денови ќе потпише договор за спроведување научни испитувања на „спутник В“ во Националниот институт за заразни болести „Лазаро Спаланцани“ во Рим.
Директорот на институтот Франческо Ваја рече дека центарот „Гамалеја“ ќе испрати тројца вработени за заедно да ја проучат ефикасноста на руската вакцина против различните варијанти на коронавирусот.
Европската агенција за лекови започна со тестирање на вакцината на 4 март, а познавачите на процесот тврдат дека таа може конечно да биде одобрена во мај.
Германската канцеларка Ангела Меркел најави дека нејзината земја ќе ја нарача руска вакцина против ковид-19 „спутник В“ доколку е овластена за употреба во Европската Унија.
Веднаш потоа и италијанскиот премиер Марио Драги не ја исклучи можноста неговата влада да почне процедура за набавка на руската вакцина против ковид-19 „спутник В”, ако во меѓувреме за тоа не се постигне координирано решение меѓу земјите членки на ЕУ и нема одобрение од Европската агенција за лекови.