Поранешниот вицепремиер за добро владеење им заблагодари на Владата и на премиерот Христијан Мицкоски за укажаната доверба, посочувајќи дека доделувањето на ваквата функцијата му претставува голема чест, но уште поголема одговорност
Поранешниот вицепремиер за добро владеење Арбен Фетаи, кој на почетокот на јуни годинава поднесе неотповиклива оставка од функцијата, денеска во објава на Фејсбук соопшти дека Владата на вчерашната седница го назначила за специјален пратеник за Европската Унија, со седиште во Брисел.
Дека Фетаи ќе биде назначен на оваа функција, претходно најави и копретседателот на Влен, Изет Меџити.
Фетаи им заблагодари на Владата и на премиерот Христијан Мицкоски за укажаната доверба, посочувајќи дека доделувањето на ваквата функцијата му претставува голема чест, но уште поголема одговорност.
„По долгата кариера во Брисел и стекнатото искуство во Владата на Република Северна Македонија, каде што ја покажав посветеноста на европската перспектива на земјата, ја преземам оваа позиција со целосно убедување дека иднината на Северна Македонија е во ЕУ. Задачата што ми е доверена е да се ангажирам во унапредувањето на процесот на европска интеграција на нашата земја, зајакнување на политичката поддршка во институциите на Европската Унија и земјите членки, придонес кон надминување на политичките и дипломатските предизвици и зајакнување на гласот на Северна Македонија во Брисел и европските престолнини“,
напиша Фетаи во објавата на Фејсбук.
Поранешниот вицепремиер за добро владеење Арбен Фетаи, кој беше кадар на Влен, на почетокот на јуни поднесе оставка од функцијата, откако претходно извесен период отсуствуваше од работа.
- Вицепремиерот Арбен Фетаи не оди на работа ниту, пак, на седници на Владата
- Мицкоски: Вицепремиерот Фетаи ми рече дека повеќе не се гледа во владата што ја предводам
Во оставката до премиерот, Фетаи изрази благодарност за укажаната доверба да ја врши функцијата вицепремиер за добро владеење, но додаде дека во сегашните околности веќе не постојат неопходните услови за функцијата да ја извршува со потребната ефикасност. Рече дека заминува со крената глава и чиста совест.