На предлог на Египет, завојуваните Израел и палестинските милитанти од „Исламски џихад“ се согласија од вечерва да има прекин на огнот во Газа, наведуваат египетски извори, откако Израел во текот на викендот гаѓаше палестински цели, што ја натера палестинската страна да истрела ракети со долг дострел врз израелски градови.
Египетски безбедносен извор изјави дека Израел се согласил на прекинот на огнот. Тој треба да стапи на сила во 19 часот по Гринич, додека пак официјален Каиро сè уште го чека палестинскиот одговор. Египетски фунцкионер изјавил дека израелската страна го прифатила прекинот на огнот, но не дал прецизна временска рамка.
Во меѓувреме, денеска продолжи најжестокиот конфликт меѓу „Исламскиот џихад“ и Израел по кратката војна минатата година. Разгорувањето на конфликтот, што потсетува на увертирата на претходните војни во Газа, ги загрижи светските сили. Сепак, се смета дека ситуацијата е релативно под контрола затоа што Хамас, владејачката група во Појасот Газа и помоќна сила од „Исламски џихад“, што е поддржан од Иран, досега остана надвор од конфликтот.
Официјални лица во Газа соопштија дека од петокот во израелските напади загинале 31 Палестинец, од кои најмалку една третина биле цивили, вклучително и деца. Израелските власти ја оспоруваат бројката и тврдат дека неколку палестински деца биле убиени во саботата вечерта во Џабалија, на север, од залутана ракета истрелана врз Израел од „Исламски џихад“, а не од војската.
Ракетите од Газа парализираа голем дел од јужниот дел на Израел и ги испратија жителите во градовите, вклучувајќи ги Тел Авив и Ашкелон, во засолништа. „Исламски џихад“ утринава ги прошири своите ракетни напади кон Ерусалим како одмазда за убиството на неговиот командант во текот на ноќта во јужниот дел на Газа, вториот таков висок офицер што го загуби во борбите.
Израел тврди дека за цел го има „Исламски џихад“, бидејќи од почетокот на операцијата во петокот уби 15 нивни борци и додава дека против милитантните води „превентивна војна“. Палестинската група возврати со над 160 ракети истрелани врз израелска територија, повеќето пресретнати од израелскиот противракетен штит „Железна купола“ .
Ова е најголемиот конфликт меѓу еврејската држава и вооружените групи во Газа од војната во мај 2021 година кога за 11 дена загинаа 260 Палестинци и 14 лица на израелска страна.