Бригадите на исламскиот џихад Ал Кудс потврдија дека Мансур и уште двајца милитанти се убиени во воздушен напад во градот Рафах, во јужна Газа. Тие објавија дека во нападот загинале и пет цивили, меѓу кои едно дете и три жени, а неколку куќи се срамнети со земја
Калед Мансур, висок командант на милитантната група Исламски џихад на палестинските територии, е убиен во израелски воздушен напад, објавија денеска бригадите на исламскиот џихад Ал Кудс.
Убиството на Мансур, кој ги предводеше операциите на Исламскиот џихад во јужниот дел на Појасот Газа, доцна синоќа, дојде само еден ден откако во израелски напад беше убиен и палестинскиот милитантен командант Тајсер Џабари.
Бригадите на исламскиот џихад Ал Кудс потврдија дека Мансур и уште двајца милитанти се убиени во воздушен напад во градот Рафах, во јужна Газа. Тие објавија дека во нападот загинале и пет цивили, меѓу кои едно дете и три жени, а неколку куќи се срамнети со земја.
Милитантите на Исламскиот џихад продолжија да стрелаат со ракети кон Израел, а израелската војска продолжи со воздушните напади врз Газа.
Денес се огласија сирените и се слушнаа експлозии во западното предградие на Ерусалим, што сигнализираше палестински ракетни напади со подолг дострел врз Израел.
Израелската војска соопшти дека залутана ракета истрелана од палестински милитанти убила цивили, вклучително и деца, доцна вечерта на 6 август во градот Џабалија во северниот дел на Газа.
Војската соопшти дека го испитала инцидентот и заклучила дека тоа се должи на погрешно пукање од Исламски џихад.
Синоќа, Министерството за здравство во Газа соопшти дека 24 лица, меѓу кои шест деца, досега се убиени во израелските воздушни напади. Не е јасно дали во оваа бројка се вклучени и жртвите во Рафах, каде се уште се бараат преживеани под урнатините, пишуваат западните медиуми.
Според денешното соопштение на израелската армија, на Западниот Брег се уапсени дваесет осомничени членови на Исламски џихад.
Главните воени команданти на Исламскиот џихад во Газа се неутрализирани во последните два дена во воздушните напади на израелската армија врз вооружената палестинска група, соопшти синоќа израелската армија.
„Раководството на военото крило на Исламскиот џихад во Газа е неутрализирано“,
рече Одед Басиок, шеф на одделот за воени операции на еврејската држава, во соопштение испратено до АФП, пренесува Хина.
Овој нов конфликт меѓу израелската армија и вооружените групи во Газа, кој започна во петокот, е најлош од мај 2021 година.
Израел и Хамас, исламската милитантна група која владее со Газа, се во судир, уштеоткако Хамас ја презеде власта во Газа пред 15 години. Оттогаш водеа четири војни и десетици помали вооружени конфликти.