Посветени сме да продолжиме со структурните реформи, да ги зајакнеме владеењето на правото и судскиот систем на кои ќе им веруваат мнозинството граѓани, а еднаквоста пред законот е приоритет за нас, рече претседателот на државата Стево Пендаровски на 75. сесија на Генералното собрание на ООН.
Тој во својот говор се осврна и на останаттие приоритети кои има за цел државата да ги реализира, а тоа се борбата против сиромаштијата, обезбедување на инклузивно и квалитетно образование, одржлив економски раст и пристојни работни места за сите. Меѓу другото тој потсети дека ќе се преземат итни активности за борба против климатските промени кои и понатаму остануваат предизвик.
„Пандемијата предизвикана од ковид-19 има сериозно влијание не само врз економијата, туку ги промени и нашите животи и навики до непрепознатливост. Во денешно време, потребата да се фокусираме на одржлив развој е уште поитна, а оваа сложена задача бара координирани реформи и темелна промена на начинот на кој ги дизајнираме нашите општества“,
рече Пендаровски.
Тој потсети дека во 2015 година земјата се согласила на спроведување на Агендата 2030, усвоена од земјите-членки на ООН.
„Нашиот фокус е подобар живот за сите граѓани, а нашите национални напори за одржлив развој се исто така усогласени со нашата клучна надворешно-политичка цел, а тоа е членство во Европската унија. Проценката за брза интеграција на целите за одржлив развој спроведена во 2019 година покажа дека 83% од националните стратешки планови за развој се усогласени со целите за одржлив развој“,
додава тој.