Условите за пријавување наложуваат кандидатите да имаат најмалку петгодишно полициско, армиско или пожарникарско искуство, без разлика дали моментално се во пензија или од други причини ги напуштиле овие служби. Исто така, потребно е да бидат здрави и во добра психофизичка кондиција соодветна на нивната возраст
Дирекцијата за заштита и спасување (ДЗС) упати јавен повик до поранешните припадници на полицијата, армијата и противпожарните единици за организирано учество во гаснењето на претстојните пожари на отворен простор и шумски пожари. Како што информира денеска на прес-конференција директорот на ДЗС, Стојанче Ангелов, целта е да се пополнат неколку позиции во пресрет на критичниот летен период.
Ангажманот, рече Ангелов, се однесува на три позиции – возачи на специјалните противпожарни возила каде спаѓаат 23 „пинцгауери“, пет „хермелини“ и 15 БТР-и пренаменети за оваа намена, оператори на противпожарните пумпи вградени во овие возила, како и оператори со противпожарни водни ранци и метли. Ангелов ги повика заинтересираните да се пријават, посочувајќи дека можат да помогнат и истовремено да заработат 2 150 евра за три месеци во текот на летото.
Според најавите, работното време ќе биде флексибилно и приспособено на состојбата на теренот, што значи дека на терен ќе се оди во деновите со зголемен обем на пожари и ќе се останува додека има потреба и услови за дејство. Користењето на слободните денови ќе се договара во зависност од потребите на теренот и на ангажираните лица, а директорот уверува дека е предвидено тие да имаат доволно слободни денови за да заминат и на однапред планиран летен одмор.
Условите за пријавување наложуваат кандидатите да имаат најмалку петгодишно полициско, армиско или пожарникарско искуство, без разлика дали моментално се во пензија или од други причини ги напуштиле овие служби. Исто така, потребно е да бидат здрави и во добра психофизичка кондиција соодветна на нивната возраст.
Директорот на ДЗС појасни дека за лицата кои се во пензија, исплатата на нивната редовна пензија нема да биде прекината. За ангажманот со договор на дело во ДЗС, тие ќе добиваат дополнителни 44 000 денари месечно во нето износ, што изнесува вкупно 132 000 денари за трите летни месеци. За сите пријавени кандидати Дирекцијата ќе организира соодветни здравствени прегледи, проверка на психофизичката состојба и кратка, ефективна противпожарна обука. Откако ќе ја добијат потребната униформа и опрема, тие најпрво ќе бидат вклучени во полесни и поедноставни интервенции, а подоцна и како поддршка на локалните сили низ целата територија на државата.
Прашан дали недостасува кадар со оглед на тоа што почнува летната сезона, Ангелов рече дека државата има повеќе од доволно возачи за специјалните возила во рамките на армијата и полицијата.
„Се обидувам во рамките на ДЗС да најдеме наши возачи што ќе бидат ангажирани директно од Дирекцијата и на тој начин армијата и полицијата ќе бидат растеретени од несуштинските дејности во текот на летото, односно да немаме побарување кон нив во случај на прогласена кризна состојба“,
рече Ангелов.
Од аспект на возраста, Ангелов рече дека секој што е здрав, а тоа ќе се утврди со лекарски преглед и секој што е во добра психофизичка состојба според годините, може да се пријави.
Прашан што се случи со минатогодишната група волонтери што беа примени за време на сезоната на пожари и дали тие сè уште се дел од тимот, Ангелов рече дека намерата е оние што доаѓале во Дирекцијата и со кои имаат редовна комуникација повторно да бидат ангажирани.
Очекувањата на Ангелов се дека сезоната на пожари ќе почне околу 10 јули и вели оти годинава екипите се подготвени како никогаш досега.
„Трите ’ертрактори’ на Дирекцијата се сервисирани, двата сè уште се во Загреб поради временски непогоди не можеше да се пренесат во Македонија. Но, очекувам дека во текот на овие денови тие ќе стигнат“,
рече Ангелов.
Тој додаде и дека 40-ина специјални возила на Дирекцијата се подготвуваат и ќе бидат навреме сервисирани. Оваа година, рече тој, сме засилени со најмалку стотина нови пожарникари примени изминатите две години и со повеќе од 35 противпожарни возила.