Според првичните сознанија кои ги покажал увидот од страна на јавен обвинител од Основното јавно обвинителство Кочани, до несреќата дошло при претекнување
Две лица загинаа, а седуммина се повредени во тешка сообраќајна несреќа што се случила денеска околу 12:45 часот на експресниот пат Штип-Кочани во близина на селото Чешиново.
Според првичните сознанија, во сообраќајката учествувале три патнички возила.
Кратко по несреќата, на местото пристигнале екипи на Итната медицинска помош, а по првично укажаната помош повредените биле пренесени во Општата болница Кочани.
„Нашите лекари сè уште ја утврдуваат здравствената состојба и степенот на повредите кај лицата. Дел од нив, кај кои се констатирани посериозни повреди, веќе се препратени за натамошен третман во болниците во Штип и Скопје. За останатите, кои се во стабилна состојба, потребни се дополнителни испитувања, по што ќе биде познато дали ќе останат кај нас“,
изјави Душанка Горгиева-Трпевски, директорка на Општата болница Кочани.
Според првичните сознанија кои ги покажал увидот од страна на јавен обвинител од Основното јавно обвинителство Кочани и вешто лице од областа на сообраќајот, до несреќата дошло при претекнување.
„Издадени се повеќе наредби за утврдување на причините за несреќата. Издадена е и наредба за прибирање траги од лице место, за обдукција на телата на починатите, наредба за испитување на примероци од крв и урина од учесниците во несреќата, а ќе биде наредено и сообраќајно-техничко вештачење“,
информираат од Јавното обвинителство.
По несреќата, сообраќајот на експресниот пат Штип-Кочани извесно време беше во прекин, а движењето се пренасочуваше по стариот регионален пат.