Двајца ученици од средното училиште СУГС „Владо Тасевски“ од Скопје се избркани од училиштето, откако едниот незадоволен што треба да вклучи камера за време на онлајн настава упатил навреди и пцости кон професорката, а негов соученик го снимил случајот и го објавил на социјалните мрежи.
Наставничкиот совет едногласно донел одлука да ги исклучи од училиштето двајцата средношколци.
„Чувствуваме должност да ја известиме јавноста по однос на случајот со недолично однесување на ученикот кој вербално нападна наставник во нашето училиште и ученикот кој неовластено го снимил и го дистрибуирал видеото од срамното однесување на ученикот. Денес заседаваше наставничкиот совет и едногласно донесе одлука да ги исклучи двајцата ученици. СУГС Владо Тасевски е училиште во кое се почитуваат кодексот на однесување, правилникот за изведување на онлајн настава и секоја повреда ќе ја санкционираме!“,
се вели во официјалното соопштение од училиштето.
Од Министерството за образование го осудија случај и посочија дека постојат одредби во кои се предвидени законски постапувања во случаи на нарушување на угледот на наставниците.
Од МОН неодамна испратија до училиштата препораки за однесување на наставниците и на учениците за време на наставата на далечина, во кои меѓудругото, се наведува дека е забрането снимање на онлајн часот.