Следната недела, како што вели директорот на Клиниката за пластична хирургија и реконструкција, Милан Стојичиќ, најверојатно ќе бидат оперирани уште пет-шест пациенти, а неколкумина веројатно ќе може да бидат префрлени на одделение
Стојичиќ додава дека пациентите кои се на механичка вентилација се во тешка состојба, но дека и другите потенцијално може да бидат доведени во таква состојба во зависност од текот на лекувањето. Инфекциите, предупредува тој, се една од компликациите што најчесто се јавуваат кај пациенти со изгореници
Седумнаесет од вкупно 30 повредени од пожарот во Кочани кои се лекуваат во Србија се хоспитализирани на Ургентниот центар во Клиничкиот центар во Белград.
Двајца од пациентите се на механичка вентилација, а на двајца им е извршена операција, вели во изјава за РТС директорот на Клиниката за пластична хирургија и реконструкција, Милан Стојичиќ. Додава дека пациентите на кои им е извршен опративен зафат се во добра општа состојба и дека постоперативниот тек се одвива непречено.

Следната недела, како што вели, најверојатно ќе бидат оперирани уште пет-шест пациенти, а неколкумина веројатно ќе може да бидат префрлени на одделение бидејќи респираторната функција успешно им се опоравува, а изгорениците им се такви што не бараат престој на одделението за интензивна нега.
„Се работи за млади луѓе. Најмладиот пациент има 17 години, само еден пациент има 35 години, инаку, сите останати се на околу 20 години“,
вели тој.
Стојичиќ објаснува дека кога станува збор за операции на пациенти со изгореници тоа подразбира отстранување на умртвеното ткиво на кожата и покривање со автотрансплантација, што значи дека сопствената кожа на пациентот се зема од други региони и се пресадува на изгорените места.
„Во овој момент нема потреба од донатори на кожа, има доволно крв и сè што е потребно за лекување на пациентите“,
вели директорот на Клиниката за пластична хирургија и реконструкција.
Нагласува дека пациентите кои се на механичка вентилација се во тешка состојба, но дека и другите потенцијално може да бидат доведени во таква состојба во зависност од текот на лекувањето. Инфекциите, предупредува тој, се една од компликациите што најчесто се јавуваат кај пациенти со изгореници.