Мајкл Мартенс во текстот на Франкфуртер алгемајне цајтунг на кој се повикува ДВ, вели дека многу набљудувачи предупредуваат да не се укине ветото како „пробив“, бидејќи предлогот вклучува многу бугарски барања и предуслови
„Бугарија го укина ветото против Северна Македонија“, пишува Франкфуртер алгемајне цајтунг за одлуката на бугарскиот парламент да го одобри предлогот на француското претседателство со ЕУ за почеток на разговори за пристапување на Северна Македонија во ЕУ, пренесува Дојче веле на бугарски јазик.
Во анализата под наслов „Западни набљудувачи: Укинувањето на ветото не мора да значи пробив“, ДВ ја пренесува изјавата на австрискиот канцелар Карл Нехамер објавена во „Дер Стандарт“ според која тој ја гледа бугарската одлука како „пробив“ и му честита на Кирил Петков за неговата лична заложба за отворање на вратата за преговори меѓу Северна Македонија и ЕУ.
Исто така се пренесува и изјавата на францускиот претседател Емануел Макрон, кој исто така, ја опиша одлуката како „важен напредок“.
Патот на Скопје кон ЕУ може да остане блокиран
Но, Мајкл Мартенс во текстот на ФАЦ на кој се повикува ДВ вели дека многу набљудувачи предупредуваат да не се гледа на укинувањето на ветото како „пробив“, бидејќи предлогот вклучува многу бугарски барања и предуслови.
„Постои опасност патот на Северна Македонија за почеток на преговори со ЕУ да остане блокиран“,
додава Мартенс.
„Барањето за вклучување на Бугарите во Уставот на Северна Македонија изгледа најлесно за исполнување“, пишува ФАЦ, „но, Бугарија, исто така, инсистира дека македонскиот јазик не постои, туку треба да се гледа како дијалект на бугарскиот и дека Северна Македонија треба да го почитува бугарското читање на ‘заедничката историја’ и да го вклучи во учебниците“.
„Такви барања не можат политички да се наметнуваат во Северна Македонија“,
вели Мартенс.
Сепак, укинувањето на ветото може да биде добра вест за Албанија, пишува германскиот весник, затоа што досега Брисел подеднакво ги третираше двете земји. Сега, ако Албанија напредува, а Северна Македонија не, може дополнително да ги сврти Албанците во Северна Македонија кон Тирана и Приштина, вели Мартенс во текстот на ФАЦ, пренесува ДБ на бугарски јазик.