Демократската унија за интеграција (ДУИ) смета дека за одржување на парламентарните избори се клучни два критериума кои треба да се исполнат. Првиот е Комисијата за заразни болести да каже дека тој процес нема да го загрози здравјето на граѓаните, а вториот е изборниот процес да биде монитеориран од ОБСЕ/ОДИХР.
Вицепремиерот за европски прашања Бујар Османи рече дека неговата партија ДУИ е подготвена за избори во секое време, но овие два услова се важни за нив да бидат исполнети.
„Тоа значи дека доколку овие два услова се исполнуваат, ако Комисијата каже дека нема ризик за здравјето на луѓето да гласаат да се организираат и набљудувачите да констатираат дека можат да дојдат да ги следат изборите, ние сме на став дека изборите можат кога било да се одржат“,
рече Османи.
Според него, за да се одржат изборите, треба да се направи анализа врз основа на постоечките параметри, врз основа на еден тренд.
„Затоа, на пример, и мерките на олеснување не ги даваме денеска ги планираме за в петок, за да имаме една недела тренд. Кога ќе треба да се донесе одлуката за избори, Комисијата треба стручно да го види трендот, бидејќи тој ја покажува проекцијата за наредниот период, какви ќе бидат наредните десет или дваесет дена“,
оцени вицепремиерот Османи.
Министерот за економија и функционер во Владата од ДУИ, Крешник Бектеши, го повтори ставот дека за нив приоритет есправувањето со пандемијата, а како партија подготвени се и оваа недела да има избор.
„За изборите што се однесува до ДУИ и други претставници на ДУИ веќе се изјасниле. За нас моментално приоритет е да се справиме со пандемијата ковид-19. Што се однесува до датумот на изборите како и секогаш ДУИ е спремна и оваа недела да има избори, но секако дека тоа ќе биде официјална одлука, која ќе се донесе може и за краток период имајќи предвид дека е веќе најавена и лидерска средба“,
рече Бектеши.