Ние продолжуваме силно да го поддржуваме правилното владеење на правото. И, за да стигнеме до европска правда, треба да ја искорениме селективната политички и етнички мотивирана правда, со одлуки кои се засноваат на нарачки, а не на закон, се наведува во денешната реакција на ДУИ по изрекувањето на првостепената пресуда за Исмет Гури и Ејуп Алими за случајот на СЈО „Титаник 3“.
Владејачката партија ја повторува заложбата за ветинг во правосудството, ама не е наведено дали реакцијата се однесува конкретно на пресудата за еден од случаите со изборни нерегуларности со кој се опфатени функционери на ДУИ. Алими е координатор на пратеничката група на оваа партија во распуштениот собраниски состав, но од партијата велат дека нема да ја коментираат пресудата до правосилната одлука.
Неселективна правда, велат од ДУИ, се постигнува преку целосен ветинг на обвинителите, судиите и политичарите.
„На кревката доверба на институциите на правдата во очите на граѓаните, како последица на постојаните политички влијанија, потфрлувањето на Специјалното обвинителство, рекетот и алчноста, Боки 13, Сваровски и Луј Витон – мотивите треба да им се стави крај“,
се наведува во реакцијата.
Од ДУИ натаму велат дека една земја членка на НАТО и во процес на преговори за членство во Европската Унија треба да се грижи за интегритетот на институциите, правната предвидливост и некорумпирана правда. ДУИ, како што се потенцира, го поддржува ветингот за сите и нема да го коментира денешниот случај сè до завршување на постапките во највисоките инстанци.