Постапката за избор на кандидати за пратеници во ДУИ е веќе почната. Ограноците на партиите до вечерва треба да достават свои предложи, кои по внатрепартиски анализи понатаму ќе подлежат на проверки. Дел од ограноците веќе и доставиле предлози, па така од Чаир испратиле 10 имиња, а од Куманово и Липково по три.
Сите кандидати за пратеници ќе подлежат на проверка односно ветинг, најави денеска Бујар Османи, кој е и шеф на изборниот штаб на ДУИ. Ветинг ќе има понатаму, најави тој, и за кандидатите за министри, директори, заменици, членови на управи одбори итн.
Ова според Османи, ќе биде втората фаза од реформата на ДУИ.
Првата рече тој, завршила со тоа што направиле целосна пререгистрација на членството за што, исто така, бил користен механизмот на ветинг поради што десетици апликации за членство биле одбиени. Во рамки на спроведените реформи, се пофали Османи, е и целосно новото раководство на Форумот на жени и на Младинскиот форум, но и во околу 90 отсто од ограноците на партијата.
„Тоа ни дава за право од денеска повторно да ја бараме довербата за заеднички да се посветиме на политиките за подбрување на квалитет на живот за побрз развој и создавање на нови работни места, поддршка со која преку ветинг ќе се создаде квалитетно судство и заедно ќе ставиме крај на неселективната правда. Здружени да работиме за нашата иднина, за нашите млади како наш прв и основен приоритет и да ги усогласиме нашите стандарди со ЕУ“,
изјави Османи.
Негативната кампања, рече тој, не е забранета, но смета дека не им помага на партиите. ДУИ, посочи тој, ќе води позитивна кампања.