ДУИ тврди дека нема никакви проблеми во коалицијата со СДСМ и дека дава недвосмислена поддршка на законите, а на најавите за ново парламентарно мнозинство возвраќа со коментар дека оваа партија била одлучувачки фактор во минатото и така и ќе остане. Социјалдемократите, пак, велат дека ако е точно тоа што го тврди коалицискиот партнер тогаш нема проблеми во коалицијата и бараат да се донесат сите законски решенија пред распуштање на Собранието.
„Ставот на ДУИ е целосна недвосмислена поддршка на законот за јавно обвинителство, на измените на Законот за Совет на јавни обвинители, на законот за АВМУ, за ветинг, за игри на среќа и сите други закони што се во процедура, вклучително и консензуалниот текст на изборниот законик. ДУИ очекува да се донесат овие закони и да се распушти Собранието најдоцна до недела. Апелираме да се изгласаат законите, ако може уште денеска, затоа што секоја понатамошна несигурност е лоша за граѓаните и за економската ситуација“,
изјави пратеникот Артан Груби.
Тој вели дека изборите биле консензуално договорени со датум, како и дека нема никакви проблеми со СДСМ.
„Нема никаков проблем со СДСМ, договорени сме, заедно пристапивме во оваа коалиција, се сеќавате добро на ситуацијата во 2016 по изборите, ДУИ беше клучен партнер, Владата е тука каде што е поради гласовите на ДУИ. Нема разлики со коалицискиот партнер, кочењето вчера беше поради некоординираност помеѓу пратеничките групи“, вели пратеникот потенцирајќи дека ДУИ не го условува законот за јавно обвинителство со ниту еден друг закон.
„Разгледувањето на какви било опции за ново парламентарно мнозинство е нивно легитимно право, ние знаме дека сега сме определувачки фактор, така ќе биде и на 12 април, како што бевме и во декември 2016, и при изборот на Талат Џафери и при изборот на владата“,
вели Груби.
Со слични пораки денеска на прес-конференција излезе и координаторот на пратеничката група на СДСМ, Јован Митревски.
„Нашата цел е носење на овие закони пред распуштање на Собранието, пред крајниот рок кој е соопштен, а тоа е 16 февруари“, вели тој.
Пратеникот вели дека ако е точно тоа што го зборува Груби тогаш нема проблем во коалицијата.
„Според тоа што го слушавте на претходната прес-конференција и тоа што ми е соопштено од коалицискиот партнер, тие настојуваат и ова законско решение да биде донесено пред распуштање, што значи нема расипување на односите ако ова како што е соопштено така и ако ги донесеме законите“,
изјави Митревски.
ДУИ ќе гласа за разрешување на Мизрахи
И Митревски и Груби велат дека двете партии ќе гласаат за разрешувањето на министерката за труд и социјална политика Рашела Мизрахи. Седницата за оваа точка, спикерот Талат Џафери синоќа ја закажа за денеска во 15 часот.
„Има предлог за разрешување на министерката за труд, а има предлог затоа што не го почитува Уставот онака како што ја потпиша заклетвата. Јас се надевам дека ВМРО-ДПМНЕ ќе се надмине себеси и ќе даде добар предлог“,
вели Митревски.
Артан Груби вели дека ДУИ ќе гласа за разрешување бидејќи партијата ги поставила своите црвени линии, а тоа е почитување на Рамковниот договор, двојазичноста и договорите со Грција и Бугарија. Така, бидејќи Мизрахи ги прекршила, тие ќе го поддржат предлогот за нејзино разрешување.
Предлогот за разрешување на Мизрахи го поднесе техничкиот премиер Оливер Спасовски откако министерката неколкупати се појави на прес-конференција во МТСП пред табла со името Република Македонија и притоа се правдаше дека таа табла ја затекнала во Министерството кога ја презела функцијата, и оти пред неа и во минатото поранешната министерка Мила Царовска одржувала средби и прес-конференции.