Државниот санитарен и здравствен инспекторат (ДСЗИ) спроведува девет вонредни инспекциски надзори за пациенти во помлада возраст, кои починаа од компликации со ковид-19, соопшти директорката на Инспекторатот, Иринка Сотирова-Бухова.
Таа на денешната прес-конференција, одговарајќи на новинарско прашање дали имаат претставки од граѓани за несоодветно лекување, рече дека во последниве неколку дена нема и дека вонредните инспекциски надзори ги прават по допрен глас, по иницијатива на ДСЗИ и по иницијатива на Министерството за здравство.
Од почетокот на пандемијата до денес, ДСЗИ иницирал и завршил 21 вонреден инспекциски надзор.
Надзорот во Клиничката болница во Битола, по информациите дека болни и починати лица се во иста просторија, сѐ уште е во тек.
„Тоа што можам да ви го кажам во однос на капацитетите од утринскиот надзор е дека во тријажниот центар за ковид-19 и за сите други респираторни инфекции битолската болница располага со 33 кревети, од кои во утринските часови беа пополнети 68. Централен довод за кислород има за 50 кревети, за останатите има две големи и за секој останат по една помала боца“,
додаде Бухова.
Овој вонреден инспекциски надзор е инициран од министерот за здравство Венко Филипче, откако на социјалните мрежи се појавија фотографии на кои се гледа како пациент прима инфузија во иста просторија додека на други болнички кревети лежат починати пациенти.