Да се обезбеди адекватна просторија за починати пациенти во Клиничката болница во Битола или да се прошири моргата за да може да одговори на потребите.
Ова ѝ е наложено на директорката на битолската болница по вонредниот надзор што го спроведе Државниот санитарен и здравствен инспекторат (ДСЗИ) откако на социјалните мрежи и во медиумите излегоа фотографии како во иста просторија во тријажниот центар пациенти примаат инфузија, а на други кревети лежат починати пациенти.
Оваа ситуација, според податоците на ДСЗИ, се случила на 22 месецов околу 16:30 часот, кога во болницата во Битола имало 13 починати пациенти, а капацитетите на моргата се за четворица починати.
„Заради динамиката на подигање на телата, секако се во склоп со законските протоколи после колку време може да бидат подигнати телата, има недостиг од простор. На директорката ѝ е наложено да обезбеди адекватна просторија или проширување на моргата, која ќе одговори на потребите. Во однос на изолираноста на пациентите со паравани, тие се веќе поставени и се задоволени основните критериуми, почитувајќи ги правата за приватност според Законот за права на пациенти“,
изјави директорката на ДСЗИ Ирина Сотирова-Бухова.
Вонредниот надзор на ДСЗИ во Клиничката болница во Битола ги опфати и санитарно-хигиенските услови, за што исто така имаше реакции во јавноста.
ДСЗИ, појасни Бухова, уште минатата година издал решение за тој санитарен јазол, за кој имаше критики, и тој е забранет за употреба, а со решение е наложена негова реконструкција.
Тој дел од болницата, според објаснувањата, пред почеток на пандемските услови бил планиран за комплетно реновирање и пренаменување во геријатриски центар, но заради напливот на пациенти повторно е отворен за употреба, освен санитарниот јазол.
„Во моментов е издадено решение по кое директорката веднаш постапува за санирање“,
рече Бухова.