Средношколците имаат поделени ставови околу полагањето државна матура – едни бараат да се одржи, но со скратени програми и поедноставени прашања, други со бојкот на наставата бараат да се откаже
Сојузот на средношколци смета дека целосното откажување на матурата ќе донесе повеќе штета отколку корист и бара да има матура, но да се ограничи на два предмета
Државната матура во 2021 година да се ограничи на два предмета со скратени програми, бараат од Сојузот на средношколци. Во соопштение до јавноста тие посочуваат дека државната матура мора да биде намалена и скратена, но велат дека нејзиното целосно откажување ќе направи повеќе зло отколку добро, особено за оваа генерација матуранти.
„Сојузот на средношколци смета дека државната матура мора да се одржи поради три клучни причини: недостиг на правна рамка, немање меѓународни преседани и задржување на квалитетот на образованието. Причината зошто Сојузот ги промени своите ставови, наведени во декларацијата, е подоцнежното темелно истражување на оваа тема, како и потребата да имаме квалитетно образование. Затоа декларацијата беше заменета со документот за политики. Оттука, Сојузот смета дека испитите треба да се одржат по скратени наставни програми (особено во годините кога матурантот посетувал настава на далечина) само по два наставни предмети“,
се вели во соопштението.
Оттаму велат дека често тврдење во јавноста е дека навидум е нелогично да се полага државна матура оваа учебна година кога имаме повисоки броеви на заразени, а матурата да не се полагала претходната учебна година кога броевите биле многу помали. Но, според Сојузот на средношколци моменталната состојба не може да се споредува со претходниот период.
„Здравствената ситуација не беше причината за откажувањето на матурата, туку таа се откажа поради вонредната состојба, уставен елемент кој е стриктно правен, а не здравствен, наспроти распространетото верување. Досега јавноста не била информирана околу планови за прогласување на вонредна состојба, а ова подразбира дека процесот на откажување на матурата треба да помине пред Собранието – значи нема да биде едноставна постапка на владина одлука, туку ќе треба да се менуваат закони. Исто така, моменталната ситуација не можеме да ја споредиме со таа во јуни, 2020, бидејќи сега, целокупното општество не слуша за вирусот првпат, туку има подготвено протоколи и правила за справување со него, како и веќе употребливите вакцини“,
се вели во соопштението.
Според Сојузот на средношколци, македонскиот образовен систем мора да ги следи примерите на другите земји кои ја продолжуваат традицијата на државна матура.
Тие ги посочуваат и резултатите на меѓународното истражување ТИММС, според кое основците од Македонија покажуваат слаби резултати во споредба со останатите земји и велат овој тренд продолжува, па затоа сметаат дека државната матура е потребна.
Велат дека таа е важна и за иднината на учениците кои без матура не можат продолжат да учат надвор од државата.
„Всушност, укинувањето на државната матура е спротивно од интересите на учениците. Најпрвин, македонските факултети се автономни институции и ако тие сметаат дека оценките од средношколското образование (без матурата) се недоволен показател, можат да воведат приемни испити. Приемните испити се лошо решение бидејќи средношколците се подготвуваат за државната матура четири години, а не за приемниот испит, што само би ги зголемиле стресот и напнатоста. Дополнително, приемните испити би ги фаворизирале учениците кои можат да си дозволат приватни тутори и подготовки. Исто така, државната матура е квалификација признаена во странство, а приемните испити ги признава само тој факултет што ги спроведува. Немањето државна матура во голема мера ја елиминира можноста нашите средношколци да студираат на странските универзитети. Решението не може да биде црно или бело, туку компромисно. Добар пример е Франција, која ги откажа другите испити, но учениците сепак полагаат испит по предмет на нивен избор. Министерството за образование и наука треба да спреми динамичен пристап кон ова прашање (полагање на матурата онлајн, измена на форматот итн.)“,
велат од Сојузот на средношколци.