Проценките се дека во Пјаченца живеат околу 10 илјади македонски државјани, главно од струмичкиот регион
Забранети се и свадби и погреби, а во кафулињата и рестораните гостите мора да се оддалечени најмалку еден метар еден од друг
Италијанските власти решија да воведат драконски мерки во обид да спречат натамошно ширење на коронавирусот во земјата по драматичната ескалација на ситуацијата со нови 1250 заразени и 36 починати од петокот до саботата.
Околу 16 милиони луѓе од северна и централна Италија се опфатени со мерките со кои се забранува влез и излез од Ломбардија, чиј главен град е Милано, и од уште 14 провинции, вклучувајќи ги Венеција, Пјаченца, Парма, Модена… Според проценките, во Пјаченца живеат околу 10 илјади македонски државјани, главно од струмичкиот крај.
Мерките предвидуваат дека до 3 април ќе бидат затворени музеите, салите за вежбање, ски-центрите, а нема да се организираат ни свадби ни погреби.
„Мораме да преземеме одговорност самите за себе. Се соочуваме со вонредна ситуација, мораме да го ограничиме ширењето на вирусот и да спречиме нашите болници да бидат пренатрупани“,
рече италијанскиот премиер Џузепе Конте, образложувајќи го воведувањето на строгите чекори.
Рестораните и кафулињата ќе бидат отворени само од 6 до 18 часот, а луѓето ќе може да седат само на оддалеченост од најмалку еден метар. На граѓаните им се советува да излегуваат од дома само во крајна нужда, а за оние што нема да ги почитуваат правилата, следуваат казни и до три месеци затвор.
Но, нејасно е како мерките ќе се одразат на авионските летови кон и од погодените региони. Веб-сајтот на аеродромот кај Милано покажува дека денеска претпладне се реализирани неколку слетувања од европски градови.
*поврзана вест „Виз ер“ ги прекина летовите за Милано, Тревизо и Бергамо до 3 април