На територијата на цела држава 3 787 лица се во самоизолација, од кои 1 088 на територија на Скопје, додека вкупниот број на лица под медицински надзор во државата е 349, а само во Скопје се 215
Во изминатите 24 часа МВР извршило контрола на 3 252 лица (712 во Скопје) кои се под мерката самоизолација на цела територија на државата, при што пет лица ја прекршиле изјавата за самоизолација, а 27 лица не биле пронајдени на адресите што ги оставиле како место за самоизолација.
Министерот за внатрешни работи Наќе Чулев на денешната прес-конференција соопшти дека на територијата на цела држава 3 787 лица се во самоизолација, од кои 1 088 на територија на Скопје, додека вкупниот број на лица под медицински надзор во државата е 349, а само во Скопје се 215.
Досега, како што кажа Чулев, се поднесени 39 кривични пријави и едно известување до ОЈО за непочитување на двата члена од Кривичниот законик 205 и 206, кои се однесуваат на ширење зараза и на непочитување на здравствените прописи во состојба на епидемија. Тие се поднесени против 47 сторители, најмногу за членот 206 и 12 за членот 205, но за некои лица кривичните се и по двата члена.
Чулев рече дека се работи за контроли што се вршат двапати дневно.
Исто така, направени се контроли и во објекти дали ја почитуваат мерката за забрана за работа. Вкупно за 24 часа биле контролирани 462 објекти во цела држава од кои шест не почитувале. Од овие, 81 објект е во Скопје и притоа е констатирано дека три не ја почитувале забраната.
Од денеска МВР почнува да ја спроведува и одлуката на Владата за забрана за посета на парк-шумата Водно од 18 часот до 6 часот наутро, како и забраната за собирање на повеќе од пет лица. Ќе продолжат и контролите по пријави дека има групирања по куќи и други живеалишта. Мерката, како што рече Чулев, ќе биде нивно разбивање и предупредување, а во одредени случаи ќе се применат и одредби од Законот за јавен ред и мир. Засега, како што нагласи, останува дека припадниците на МВР ќе бидат засилени со припадници на ЕБОР, и засега не се размислува да повикување на резервниот состав на полицијата.
Чулев рече дека не се размислува ниту за воведува кризна состојба во Скопје, иако упати дека тоа е одлука на Владата.