Станува збор за дел од донација за 130 ученици од македонското малцинство во Албанија која од Скопје беше испратена вчера
Дел од донацијата од Владата на Северна Македонија за учениците Македонци во Голо Брдо и Мала Преспа, Албанија, пристигнаа на крајната дестинација.
„Училишните торби и прибори, како и печките за греење на училниците се дел од пошироката листа за потребите на македонската заедница во Албанија што сукцесивно ќе се доставува во текот на наредните денови“,
јави весникот „Македониум“.
Повикувајќи се на македонската амбасада во Тирана, весникот додава дека на амбасадорот Данчо Марковски посебно задоволство му било искажано од страна на Македонците во областа Голо Брдо за обезбедениот булдожер, со кој жителите од овој крај ќе може да ги расчистуваат непроодните снежни намети во текот на зимата, кои честопати ги држат овие краишта отсечени.
„Средбата со претставниците на партијата Македонската алијанса за европска интеграција, македонските друштва, наставниците и локалната самоуправа беа искористени за размена на мислења и идеи за натамошно продлабочување на активностите за зачувување на македонската етничка, јазична и културна посебност и поврзаност со матична држава Република Македонија“,
наведува весникот.
Ранците и училишниот прибор за повеќе од 130 ученици беше испратена од Скопје вчера. Од МНР објавија дека станува збор за донација од Министерството за образование и наука (МОН), а која следува откако шефот на дипломатијата, Бујар Османи ги посети Пустец и Голо Брдо во август лани, по што и на владина седница беше донесен заклучок за испраќање донација.