По вторпат оваа година, еврото падна под вредноста на американскиот долар во понеделникот, со што достигна најниско ниво во последните 20 години бидејќи се интензивираше загриженоста од влошување на енергетската криза и од дополнително заострување на монетарната политика на САД
Заклучно со денеска, азиските акции се во пад веќе шеста сесија по ред, откако повторниот скок на цените на енергентите во Европа ги поттикна стравувањата од рецесија што, пак, придонесе вредноста на еврото да се спушти на најниско ниво во последните 20 години, објави „Евроњуз“.
Еврото падна под вредноста на американскиот долар во понеделникот, по вторпат оваа година, бидејќи се интензивираше загриженоста од влошување на енергетската криза и од дополнително заострување на монетарната политика на САД. Еврото на девизниот пазар се тргуваше по цена од 0,9953 долари, наведува „Синхуа“.
Референтните цени на гасот во Европската Унија се зголемија за 13 отсто во текот на ноќта, на рекордно највисоко ниво, со што двојно се зголемија за само еден месец и сега се 14 пати повисоки од просекот во изминатата деценија.
Аналитичари на американската „Сити банк“ во понеделникот предупредија дека инфлацијата во Велика Британија може да достигне 18 отсто доколку цените на енергијата не се ограничат, што е повеќе од деветпати од прогнозата на Банката на Англија. Инфлацијата на потрошувачките цени последен пат достигна такво ниво во 1976 година.
Еден аналитичар рече дека енергетска ситуација сугерира дека врвот на инфлацијата сè уште не е достигнат, со висок ризик таа да остане висока некое време без интервенција на централната банка.
„Тогаш не е изненадување да се види американскиот долар на речиси повеќедецениски највисоки нивоа во однос на еврото и (британската) фунта“,
рече Тапас Стрикланд, директор за економија во НАБ, пренесува „Евроњуз.
Заедничката европска валута некое време се задржа на ниво од 0,9937 долари, но вчера повторно падна под вредноста на доларот (најниско во последните 20 години) поради големата енергетска криза во Европа и американската централна банка која сè уште е во офанзива за ограничување на инфлацијата.
Најавеното затворање поради одржување на гасоводот „Северен тек 1“ – кој го снабдува најголемиот дел од Европа со руски гас – меѓу 31 август и 2 септември, дополнително ги зголеми стравувањата од недостиг од природен гас и ги зголеми цените на овој енергент во Европа.
„Ова го зголемува ризикот од значително економско забавување до крајот на годината во еврозоната“,
изјави Шон Озборн од „Скотиа бенк“.
Германскиот канцелар Олаф Шолц, кој има за цел да ја намали зависноста на неговата земја од руски енергенти, оваа недела е во Канада за да потпише договор за снабдување со водород за Германија во иднина. Но, во меѓувреме, тој рече дека сепак на земјата ќе ѝ биде потребен и природен гас.
Британската фунта беше малку подобра од еврото во понеделникот во однос на доларот. Го држеше нивото од март 2020 година, периодот на почетокот на пандемијата, од 1,1760 долари за фунта. Пред 2020 година фунтата немаше паднато под 1,18 долари од 1985 година.
Унгарија, која е силно зависна од руските енергенти, забележа пад на форинтата на најниско ниво досега во однос на доларот, од 411 форинти за долар.
„Дамокловиот меч што виси над Европа е тука да остане“,
предупреди Кит Јукес, аналитичар во „Сосиете Женерал“.
Некои аналитичари сметаат дека вредноста на еврото дополнително ќе паѓа како што се приближува зимата. Но, според Шон Озборн, доларот веќе се искачил многу високо и вели дека не е убеден дека ќе оди многу нагоре на среден рок, се вели во текстот на „Евроњуз“.