Градоначалникот на скопската општина Карпош, Стефан Богоев за „360 степени“ потврди дека докторка од Клиниката за кожни болести минатата недела им држела предавања за начините како да се заштитат од коронавирус на ученици од четврто и од седмо одделение од ООУ “Братство” во Тафталиџе 2.
Загрижените родители на социјалните мрежи ја споделија информацијата дека докторката Кујтиме Мехмети, вработена на кожната клиника, била во вторникот во училиштето за на децата да им ги претстави превентивните мерки кои треба да ги преземаат за да не се заразат со коронавирусот.
„Посочената докторка е во изолација, како и сите други доктор(к)и и кадар од Клиниката. Контактираме со надлежните и правиме ќе се постапува согласно протоколот. За жал, ова е резултат на неодговорниот пристап на директорката на Клиниката за кожни заболувања. Била во контакт со ученици, но не и во близок контакт со директорката на Клиниката. Правиме се што можеме да ја намалиме штетата предизвикана од неодговорен здравствен работник”,
вели градоналникот на Карпош.
Од општината интегрално ја пренесуваат и писмената изјава на др. Кујтиме Мехмети во која таа посочува дека е во добра општа здравствена состојба.
„Немам никакви симптоми, но сум во домашна изолација, како и сите останати вработени во Клиника за дерматологија. Предавањето во ООУ ‘Братство’ го одржав во вторникот, а од понеделник не сум била во близок контакт со директорката на Клиниката за дерматологија. Во вторникот директно отидов во ООУ ‘Братство’, каде и го одржав договореното предавање, па потоа отидов на работа. Имајќи предвид дека во понеделник не сум била во близок контакт со директорката на Клиника за дерматологија, според протоколот: Категории на ризик според експозиција поврзана со меѓународни патувања, или контакт со потврден случај, спаѓам во група на низок ризик!“,
пишува во изјавата на др. Мехмети.
Нејзините деца се ученици во одделенијата каде таа ги држела предавањата. Тие не одат на настава и заедно со мајката се во изолација. Во однос на останатите деца кои присуствувале на предавањата, од општината велат дека се во постојани консултации со здравствените власти, кои засега укажуваат дека не постои ризик и дека нема потреба да се прекине наставата во ова училиште.