Обвинителството во Кавадарци бара казна од 4 500 евра за доктор од Општата болница во Кавадарци, кој наместо да седи во изолација не ја почитувал мерката и 10 дена одел на работа. Причината поради која требало да седи во изолација е што неговата ќерка била на патување во Италија.
„И покрај упатствата дадени директно од страна на специјалист-епидемиолог да останат целото семејство во домашна изолација од 14 дена поради патувањето на нивната ќерка која на 6 март се вратила од Италија, обвинетиот во периодот од 10 март до 20 март продолжил да оди на работа во болницата каде е вработен како доктор. На 10 март заедно со неговата ќерка правеле анализи на Одделот за микробиологија и биле во амбулантата за уво, нос и грло во Кавадарци“,
соопштија од обвинителството.
Делото за кое се товари лекарот е непостапување според здравствените прописи за време на епидемија.