Судијката Добрила Кацарска е избрана за нова претседателка на Уставниот суд. Таа добила шест гласа „за“ од вкупно девет уставни судии, со што е постигнато потребното двотретинско мнозинство за избор на претседател на Судот.
На прашањето на „360 степени“ кои ќе ѝ бидат приоритетите во работењето, Кацарска вели:
„Ќе се трудам да го отворам судот за јавноста и да го подигнат угледот на судот.“
Која е Добрила Кацарска?
Новата претседателка на Уставниот суд, Добрила Кацарска, е родена 1957 година во Ресен. Таа беше избрана за уставна судијка во 2020 година, а пред изборот зад себе имаше 38 години стаж во судството, од кои 34 како судијка.
Во судството влегува во 1982 година, како приправник во Општинскиот суд Скопје 1, а од 1984 е стручен соработник. Во 1986 година е избрана за судијка и сѐ до 2005 година работи во Граѓански оддел – парница, во Основниот суд Скопје 1.
Од 2005 до 2009 година таа е претседателка на Основен суд Скопје 1 Скопје. Во 2009 е распоредена во Кривичен оддел за полнолетни лица, а од 2018 година е распоредена во Одделението надлежно за судење дела од областа на организираниот криминал и корупција.
За судија на Уставниот суд на Република Северна Македонија е избрана на 26 ноември 2020 година, како предлог на Судскиот совет зад кој тогаш застанаа сите членови на „судската власт“.
Во последниве години, како судијка во Основниот суд Скопје 1, Кацарска го судеше најобемниот предмет, за настаните од 27 април, и случајот „Тенк“ за начинот на набавка на блиндираниот „мерцедес“, во кој на затворски казни се осудени Никола Груевски, Гордана Јанкулоска и Ѓоко Поповски.
Токму овие судски случаи беа причината поради која имаше силен отпор од опозицијата при нејзиниот избор за уставна судијка. Седницата на Собранието за нејзиниот избор наликуваше на улични протести.
Наскоро нови промени и во составот на Уставниот суд
Мандатот на претседателот на Уставниот суд е три години, без право на реизбор. Досега претседател на Уставниот суд беше уставниот судија Сали Мурати, кој порано ја напушта позицијата бидејќи му истекува деветгодишниот мандат како судија, за што нема право на реизбор.
Но, освен Сали Мурати, оваа година им завршува мандатот на уште тројца уставни судии. Во мај 2012 година за уставна судијка беше избрана Елена Гошева, во јуни 2012 година Никола Ивановски, а во декември истата година и Јован Јосифовски. Тоа значи дека го крајот на 2021 година Уставниот суд ќе добие четири нови судии.